Oralda «Bala tili - bal» baıqaýy márege jetti

ORAL. QazAqparat - Búgin «Rýhanı jańǵyrý» baǵdarlamasy aıasynda Ǵ.Qurmanǵalıev atyndaǵy oblystyq fılarmonııa zalynda mektepke deıingi uıym mekemeleriniń tárbıelenýshileri arasynda «Bala tili - bal» óńirlik baıqaýy márege jetti, dep habarlaıdy «QazAqparat» tilshisi.

BQO tilderdi damytý basqarmasynyń áleýmettik jobalardy júzege asyrý tapsyrysy negizinde «Eýrazııa áleýmettik-gýmanıtarlyq zertteý ortalyǵy» qoǵamdyq birlestigi uıymdastyrǵan baıqaýǵa oblys aýdandary men Oral qalasynan barlyǵy 17 úmitker qatysyp, baq synady.

Óner saıysy búldirshinder arasynda memlekettik tildi keńinen nasıhattaý, olardy otanshyldyqqa tárbıeleý, ulttyq jáne rýhanı qundylyqtardy baıytý maqsatyn kózdeıdi. 

Qatysýshylar aldymen «Balalarǵa bazarlyq» baǵyty boıynsha folklorlyq týyndylardan úzindiler, tanymal aqyndardyń balalarǵa arnaǵan óleńderin mánerlep oqýdan synǵa tústi. «Kóńilim ándi uǵady» baǵyty boıynsha balalarǵa arnalǵan ánderdi oryndasa, sodan keıin «Jańyltpashtar áleminde» jańyltpashtardy aıtyp berdi. «Júırikten júırik ozar jarysqanda» bóliminde maqal-mátel aıtyp, sýretke qarap áńgime qurastyrdy.

Baıqaý qorytyndysynda Qaratóbe aýdandyq bóbekjaıynyń tárbıelenýshisi Rysbek Aqylbaı bas júldeni jeńip aldy. Terekti aýdany Podstepnyı aýyly «Báıterek» bóbekjaıynan kelgen Arsen Syrǵabaev birinshi, Aıarý Amangeldi (Shyńǵyrlaý aýdany «Bolashaq» bóbekjaıy) ekinshi, Danıel Lıgnovskıı (Oral qalalyq №19 «Zolotoı petýshok» bóbekjaıy) úshinshi orynǵa ıe bolyp, baǵaly syılyqtarmen marapattaldy.