Oralda áskerıler 103 jastaǵy maıdangerdi Jeńis kúnimen quttyqtady

ORAL. QazAqparat - Búgin QR Ulttyq ulanyna qarasty «Batys» óńirlik qolbasshylyǵynyń áskerı qyzmetkerleri BQO qorǵanys isteri jónindegi departamenti ókilderimen birge 103 jastaǵy maıdanger, doǵarystaǵy polkovnık Semen Danılındi Uly Jeńistiń 72 jyldyǵymen quttyqtady, dep habarlaıdy «QazAqparat» tilshisi.

«Batys» óńirlik qolbasshylyǵynyń baspasóz qyzmetinen túsken málimetke qaraǵanda, maıdanger turatyn úıdiń aldynda 5517-áskerı bólimniń áskerı orkestri soǵys jylǵy áýenderdi oryndady.

«Qanshama jyldar ótse de, Uly Otan soǵysyndaǵy sizderdiń jeńisterińiz óshpek emes. Bizdiń halqymyzdyń maqtanyshy bolyp qala bermek. Sizge tabandylyǵyńyz ben batyrlyǵyńyz, ishki ásker salasyna sińirgen eńbegińiz úshin rızashylyǵymyzdy bildire otyryp, myqty densaýlyq, uzaq ómir tileımiz», dedi áskerı bólim komandıri, podpolkovnık Asylbek Shaıqamalov.

 

«Arada 72 jyl ótse de, sol aýyr kezeń esimizden shyqqan emes. Búgingi urpaqqa ashyq aspan, beıbit ómir tileımin. Soǵys degen zulmattyń aty óshsin. Búgingi erekshe quttyqtaýlaryń úshin alǵysymdy aıtamyn», dedi Semen Akımovıch.

1914 jyly 30 qyrkúıekte Kýrsk oblysynda dúnıege kelgen Semen Danılın Brıansk áskerı-saıası ýchılışesiniń kýrsantynan 143-gvardııalyq mınomet polki batalony komandıriniń saıası bólim jónindegi orynbasarlyǵyna deıingi joldan ótti. Stalıngrad túbindegi, Kýrsk ıinindegi jan alyp, jan berisken shaıqastarǵa qatysty.

 

Soǵystan keıin S.Danılın Almaty, Qaraǵandyda ishki ásker polki komandıriniń saıası bólim jónindegi orynbasary retinde qyzmet atqaryp, doǵarysqa shyqty. Qyzdarynyń biri Tatıana Oral qalasynda turǵannan keıin zaıyby, marqum Anna Pavlovnamen birge osynda kóship keldi.

Uly Otan soǵysyndaǵy erligi úshin S.A.Danılın «Qyzyl Juldyz», ekinshi dárejeli Otan soǵysy ordenderimen, kóptegen medaldarmen marapattaldy.