Oralda «Altyn Orda» teatrynyń alǵashqy qoıylymy sahnalandy
Teatrdyń premerasy aktrısa, dramatýrg, QR Mádenıet salasynyń úzdigi Aıjan Atymtaevanyń «Kim patsha?» ertegisimen ashyldy.
Ertegini qoıǵan H.Bókeeva atyndaǵy oblystyq qazaq drama teatrynyń akteri ári rejıssery Samal Ábýovtiń aıtýynsha, atalǵan teatr Altyn Ordanyń 750 jyldyǵyna oraı Oral qalasy mádenıet jáne tilderdi damytý bólimi mádenı-aǵartý birlestigi janynan ótken jyly qurylǵan bolatyn.
Mundaǵy maqsat teatr ónerine qadam basqysy keletin jas býynǵa jol ashý, olardyń sheberligin shyńdaý edi. Alaıda pandemııaǵa baılanysty teatr jumysy toqtap qaldy.
«Bıyl aqpan aıynda úsh ret kastıng jasap, talapty balalardy iriktedik. Aıǵa jeter-jetpes ýaqytta osy ertegini shyǵardyq. Bul – teatrdyń eń alǵashqy qoıylymy», deıdi S.Ábýov.
Teatrdyń ashylý saltanatyna Oral qalasynyń ákimi Abat Shynybekov, osy óner salasynyń beldi ókilderi qatysyp, jas ujymǵa sáttilik tiledi.
Erteginiń oıdaǵydaı sahnalanýyna kórkemdik jetekshi Ásemgúl Tólepbergen de óz úlesin qosty. Qoıylym baletmeısteri – Qymbat Sarıeva.
Premerada Arsen Nuftyǵalıev, Meńdálı Meńdálıev, Nargız Aıshýaqova, Gúlnaz Haırollaeva, Álıjan Turǵalı, Aqtolqyn Sábıtqyzy, Sardar Eren, Elnara Seıtjan oınap, óz ónerlerin kórsete bildi.
