Oralda 500 oryndyq stýdenttik jataqhana paıdalanýǵa berildi
Respýblıka kúni qarsańynda Mahambet Ótemisov atyndaǵy Batys Qazaqstan ýnıversıtetiniń stýdentteri úshin 500 oryndyq 9 qabatty jataqhana paıdalanýǵa berildi, dep habarlaıdy Kazinform.
Jańa jataqhana QR Prezıdenti Qasym-Jomart Toqaevtyń «Ádiletti Qazaqstan – bárimiz jáne árqaısysymyz úshin. Qazir jáne árdaıym» saılaýaldy baǵdarlamasynyń 89-tarmaǵynda kórsetilgen «Stýdenttik jataqhanadaǵy oryn tapshylyǵy máselesin sheshý» tapsyrmasyna sáıkes júzege asty.
Saltanatty jıyn QR Joǵary bilim jáne ǵylym mınıstri Saıasat Nurbektiń arnaıy beınequttyqtaýymen bastaldy.
Mınıstr toqsan jyldan astam tarıhy bar Mahambet Ótemisov atyndaǵy Batys Qazaqstan ýnıversıtetiniń Qazaqstannyń batys óńirine júz myńǵa jýyq kásibı bilikti ustaz mamandy daıyndap shyǵarǵan bilim ordasy ekendigin atap ótti.
«Respýblıka boıynsha alǵash ret ýnıversıtet óz qarajaty esebinen stýdentter úıin turǵyzdy. Óńir basshylary osy oraıda úlken qoldaý kórsetip otyr. Búgingi tańda BQÝ stýdentteri 100 paıyz jataqhanamen qamtamasyz etiledi. Jumyla kótergen júk qashanda jeńil. El ıgiligi úshin jasap jatqan eńbekterińiz eseli, jumystaryńyz jemisti bolǵaı!» dedi S.Nurbek.
Batys Qazaqstan oblysynyń ákimi Narıman Tóreǵalıev Respýblıka kúni qarsańynda óńirdegi bilim men ǵylymnyń qara shańyraǵy – Batys Qazaqstan ýnıversıtetinde tórtinshi jataqhananyń ashylyp otyrǵanyn jetkizdi.
«Qazirgi stýdentter erkin oıly, ózderine senimdi. Memlekettiń damýy, ósip-órkendeýi osy jastarǵa baılanysty. 2018 jyly Oral qalasy ákimdiginiń qaýlysymen ýnıversıtetke aýdany 0,1942 gektar jer telimi paıdalanýǵa berildi. Osy orynda toǵyz qabatty, 500 oryndyq jataqhana boı kóterdi. Respýblıka bo ıynsha tuńǵysh ret óz qarajaty esebinen jataqhana turǵyzýdy qolǵa alǵan ýnıversıtet rektory Nurlan Habıbollaulyna rızashylyǵymdy bildiremin. Bul tájirıbeni óńirdegi ózge de oqý oryndary júzege asyrady dep senemin» dedi óńir basshysy.
Oblys ákimi Narıman Tóreǵalıev, M.Ótemisov atyndaǵy Batys Qazaqstan ýnıversıtetiniń rektory, professor Nurlan Serǵalıev pen Qazaqstan Respýblıkasy Prezıdentiniń ataýly shákirtaqy ıegeri, respýblıkalyq pándik olımpıadanyń jeńimpazy, stýdentter úıiniń turǵyny, pedagogıka fakýltetiniń 4-kýrs stýdenti Gúlsezim Segizbaev jańa jataqhananyń lentasyn qıdy.
Aıta keteıik, nysan zamanaýı ınfraqurylymmen jabdyqtalǵan. Ár sektsııada as, jatyn, jýyný bólmeleri bar.
Sonymen qatar múmkindigi shekteýli stýdentterge ınklıýzııa formatyna sáıkes arnaıy bólmeler men múgedektigi bar bilim alýshylarǵa 16 oryn berilmek.
Budan bólek stýdentter úıinde dárihana, medıtsınalyq pýnkt, kafeterıı jáne muǵalimder men kezekshilerge arnalǵan bólmeler iske qosylmaq. Jataqhana aýmaǵy tolyq abattandyrylyp, sport alańy turǵyzyldy.
M.Ótemisov atyndaǵy Batys Qazaqstan ýnıversıtetinde jańa jataqhanany qosa alǵanda, stýdentterge 1526 oryn jasaqtaldy. Aldaǵy ýaqytta jergilikti kásipkerlerdi tarta otyryp, jańa ǵımarattardyń qurylysy qolǵa alynady.
"Qarjy ortalyǵy" AQ Ǵylym jáne joǵary bilim mınıstrliginiń atynan ýnıversıtettiń jataqhana salý shyǵyndaryn 6 jyl ishinde óteıdi.
Bir orynǵa memlekettik tapsyrys mólsheri - 195 AEK, 500 stýdent qonystanǵan kezde aıyna 28 mln teńge tólenedi.
Jataqhananyń qurylysy men paıdalanýǵa berý barysynda QR Ǵylym jáne joǵary bilim mınıstri Saıasat Nurbek pen Batys Qazaqstan oblysynyń ákimi Narıman Tóreǵalıev arasynda eki jaqty kelisimge qol qoıyldy.
BQÝ basqarma tóraǵasy – rektor Nurlan Serǵalıev jobaǵa bastan-aıaq jetekshilik etti. Atalmysh nysandy memlekettik satyp alý shartyna sáıkes merdiger uıym – «BETA Services» JShS saldy.
