Oralda 17 jastaǵy qostanaılyq jasóspirim esirtkimen ustaldy

ORAL. KAZINFORM – Oral qalasynda Batys Qazaqstan oblysy polıtsııa departamenti esirtki qylmysyna qarsy is-qımyl basqarmasynyń qyzmetkerleri jedel-izdestirý is-sharalary barysynda Derkól kentinde 2007 jyly týǵan jasóspirimdi ustady.

BQO polıtsııa departamentiniń baspasóz qyzmetinen málim etkenindeı, jeke tintý kezinde odan 25 zip-paket tárkilendi. 

Keıin jasóspirim esirtki jasyrǵan oryndaryn kórsetip, sol jerlerden 109 zip-paketke salynǵan úsh úlken orama tabyldy. Saraptama nátıjesinde alynǵan zattardyń jalpy salmaǵy 249 gramm, ıaǵnı shamamen 1245 dozalyq «Alfa PVP» psıhotroptyq zaty ekeni anyqtaldy. 

«Tergeý barysynda qolǵa túsken jasóspirimniń Qostanaı oblysynyń turǵyny ekeni belgili boldy. Ol Oral qalasyna Telegram-arna arqyly jumysqa shaqyrylǵan. Jumys berýshiler jol júrý jáne turý shyǵyndaryn ótegen. Qazirgi ýaqytta kúdikti ýaqytsha ustaý ızolıatoryna qamaldy. Atalǵan derek boıynsha esirtki zattarynyń zańsyz aınalymy boıynsha sotqa deıingi tergeý amaldary júrgizilýde. Polıtsııa zańsyz esirtki saqtaý jáne taratýdyń qylmystyq jaýapkershilikke ákep soǵatynyn eske salady. Batys Qazaqstan oblysy polıtsııa departamenti óńirdegi esirtki qylmysyna qarsy kúresti kúsheıtip, «Oral – esirtkisiz qala» baǵdarlamasy aıasynda esirtki zattarynyń zańsyz aınalymyna tosqaýyl qoıý jumystaryn belsendi túrde jalǵastyrýda», dep habarlady vedomstvodan. 

Eske sala keteıik, budan buryn Oralda mas kúıinde aıaldamanyń terezesin syndyrǵan er adamnyń ustalǵanyn jazǵan bolatynbyz.