Oral turǵyny anasynyń ólimi úshin aýrýhanadan 2 mln teńge óndirdi
ORAL. KAZINFORM – Oral qalasynyń turǵyny anasynyń ólimi úshin aýrýhanadan moraldyq zalal retinde 2 mln teńge óndirip aldy.
QR Joǵarǵy sotynan alynǵan málimetke qaraǵanda, 2019 jyly jedel járdem brıgadasy dene qyzýy kóterilgen 76 jastaǵy áıeldi jalpy álsizdikpen Oral qalalyq aýrýhanasyna jetkizgen.
Dárigerler sozylmaly bronhıt pen pnevmonııa degen dıagnoz qoıyp, terapııa bólimine jatqyzǵan. Biraq em nátıje bermeı, naýqastyń jaǵdaıy aýyrlaǵan.
Kompıýterlik tomografııa plevrıt degen kúdikti kórsetken.
Tórt aptadan keıin naýqastyń jaǵdaıy nasharlaýyna baılanysty oblystyq aýrýhanaǵa jetkizilip, sol jerde qaıtys bolǵan.
Joǵarǵy sot derekterine qaraǵanda, qaıtys bolǵan áıeldiń uly densaýlyq saqtaý basqarmasyna dárigerlerdiń salǵyrttyǵy men tıisti em qabyldamaǵany týraly shaǵymmen júgingen, tekserý barysynda aýrýhana tarapynan zań buzýshylyqtar anyqtalǵan. Tekserý materıaldary Batys Qazaqstan oblystyq polıtsııa departamentine joldanyp, qylmystyq is qozǵalyp, qylmystyq quqyq buzýshylyq quramynyń bolmaýyna baılanysty birneshe ret toqtatylyp, prokýratýra kúshin joıǵan.
«Densaýlyq saqtaý basqarmasy qalalyq aýrýhananyń qarsylyǵyn qabyldamaǵandyqtan, marqumnyń uly aýrýhanadan moraldyq shyǵyndy óteý týraly Oral qalasynyń № 2 sotyna shaǵym túsirgen. Ol ananyń ólimine sapasyz medıtsınalyq kómek pen qalalyq aýrýhana dárigerleriniń áreketsizdigi sebep bolǵanyn atap ótken. Sondaı-aq talap qoıýshynyń anasy emdelip jatqan aýrýhananyń terapııa bóliminde jalpy praktıkalyq dárigerdiń kýáligi bar maman jumys istegeni, oǵan quqyǵy joq ekeni týraly fakt belgili boldy. Sarapshy naýqasqa onyń jasy men onda bar sozylmaly aýrýlary, sonyń ishinde búırektiń jedel zaqymdanýyn týdyrǵan antıbıotıkter eskerilmeı, dári-dármek taǵaıyndalǵanyn jetkizdi. Tıisti bakterııaǵa qarsy preparattar men gemodıalızdi engizý naýqastyń ómirin uzartýy múmkin edi. Sot medıtsınalyq qujattardy, sarapshylyq qorytyndylardy jáne tekserý aktisin eskere otyryp, der kezinde qaıtalama synaqtar ótkizbeý, naýqastyń jaǵdaıyn durys baǵalamaý, emdeýdi kesh túzetý, nefrologtyń keńesiniń ýaqytynda bolmaýy men konsılıýmnyń kesh júrgizilýi aýrýdyń nátıjesine áser etkenin jáne ólimge ákelip soqqanyn anyqtady. Osy aıtylǵandardyń negizinde talap qoıý ishinara qanaǵattandyrylyp, talap qoıýshynyń paıdasyna aýrýhanadan 2 mln teńge moraldyq shyǵyn óndirildi. Sheshim zańdy kúshine engen joq», - dep habarlady vedomstvodan.
Eske sala keteıik, budan buryn Aqsaı qalasynda ıt qapqan 5 jasar qyzdyń aýrýhanaǵa túskenin jazǵan bolatynbyz.
