Oral qalasynyń turǵyny úsh kúnde jol erejesin 23 ret buzǵan

Oral qalasynyń turǵyny úsh kúnde jol qozǵalysy erejesin 23 ret buzǵan, dep habarlaıdy QazAqparat tilshisi.

BQO polıtsııa departamenti baspasóz qyzmetinen túsken málimetke qaraǵanda, Sunsar Smart Qorgau júıesiniń kómegimen «Toıota Kamrı» avtokóliginiń jol erejesin áldeneshe ret buzǵany anyqtaldy.

Oral qalasy polıtsııa basqarmasy patrýldik polıtsııa batalonynyń qyzmetkerleri atalǵan avtokólikti 26 qyrkúıek kúni toqtatty.

«Avtokólik júrgizýshisi Oral qalasynyń 1980 jylǵy turǵyny ekendigi belgili boldy. Tekserý barysynda osy kóliktiń 23-26 qyrkúıek aralyǵynda jol qozǵalysy erejesi boıynsha 23 quqyq buzýshylyq jasaǵany anyqtaldy. Aıyppuldyń jalpy somasy 569 myń teńgege jetken. Júrgizýshi ońaılatylǵan tártippen aıyppuldyń 50 paıyzyn óteı alady. Qazirgi ýaqytta avtokólik arnaıy turaqqa qoıyldy», dep habarlady vedomstvodan.

Departamentten málim etkenindeı, 18-22 qyrkúıek aralyǵynda ótkizilgen «Boryshker» jedel aldyn alý is-sharasy kezinde quqyq buzýshylardan 2087 aıyppul (31 mln 770 myń teńge) óndirildi. Sunsar Smart Qorgau júıesin qoldana otyryp, QR Ákimshilik quqyq buzýshylyq týraly kodeksiniń 785, 797-baptaryna sáıkes jol qozǵalysy qatysýshylardyń ómiri men densaýlyǵyna qaýip tóndiretin qaskúnem quqyq buzýshylardyń 25 avtokóligi mamandandyrylǵan turaqqa qoıyldy.

Eske sala keteıik, budan buryn BQO-daǵy jol apatynda shaqalaq pen eki jasar sábıdiń analarynan aırylǵanyn jazǵan bolatynbyz.