Oral qalasynda zańsyz qubyr qazǵandar ustaldy
Oral qalasynda zańsyz qubyr qazǵandar ustaldy, dep habarlaıdy Kazinform.
«Batys sý arnasy»» JShS-nyń baspasóz hatshysy Baýyrjan Ǵılajevtiń málim etkenindeı, oqıǵa 26 qarasha kúni Zachagan kentindegi «Revýnok» kafesi mańynda boldy.
«Belgisiz bireýler orman aýmaǵynda jer qazý jumystaryn júrgizip, bolat turbalardy alýmen aınalysqan. Atalmysh turbalar «Batys sý arnasy» JShS teńgeriminde (№1 kárizdik sorǵy stansasynan shyǵatyn rezervtik káriz kollektorynyń turbalary). Jumystar kásiporynnyń kelisiminsiz júrgizilgen. Oǵan qosa kóp terekter búlingen. Kúdiktiler qylmys ústinde qolǵa tústi», - deıdi B.Ǵılajev.
BQO polıtsııa departamentiniń baspasóz qyzmeti osy oqıǵa boıynsha eki kúdiktiniń ustalǵanyn jetkizdi.
«Qazirgi kezde QR QK 188-baby 2-bóligine (adamdar tobynyń ózara sóz baılasýymen jasalǵan urlyq) sáıkes tergeý amaldary júrgizilip jatyr. Bul bap boıynsha aıypty dep tanylǵan adam múlki tárkilenip, úsh myń aılyq eseptik kórsetkishke deıingi mólsherde aıyppul salýǵa ne sol mólsherde túzeý jumystaryna nemese bir myń eki júz saǵatqa deıingi merzimge qoǵamdyq jumystarǵa tartýǵa ne bes jylǵa deıingi merzimge bas bostandyǵyn shekteýge nemese sol merzimge bas bostandyǵynan aıyrýǵa jazalanady», - dep habarlady vedomstvodan.
Foto: "Batys sý arnasy" Foto: "Batys sý arnasy"
