Oral qalasynda Ǵumar Qarash atyndaǵy mýzeı ashylsa, durys bolar edi - Jantas Safýllın
ORAL. KAZINFORM – Batys Qazaqstan oblysynda kórnekti aqyn, oıshyl, Alash qaıratkeri Ǵumar Qarashtyń 150 jyldyq mereıtoıy atalyp ótildi.
BQO tarıhı-ólketaný mýzeıiniń dırektory Jantas Safýllınniń málim etkenindeı, osy is-sharalar kezinde ǵalymdar men mamandar ortaq toqtamǵa kelgen. Bul – Oral qalasynda Ǵumar Qarash atyndaǵy mýzeı nemese ǵylymı-zertteý ortalyǵyn ashý.
Onyń sózine qaraǵanda, Batys Qazaqstan oblysynda birneshe memorıaldyq mýzeı bar. Mysaly, Báıterek aýdany Darııan aýylynda Mıhaıl Sholohovtyń, Oralda Aleksandr Pýshkın men Emelıan Pýgachevtiń mýzeıleri jumys isteıdi.
- Ǵumar Qarash Jánibek aýdanynda dúnıege kelip, Bókeı ordasynda qyzmet etti. Qazaq tarıhynda «Qazaq» gazeti Orynborda shyqsa, «Aıqap» jýrnaly Troıtsk qalasynda basyldy. Sol sekildi «Qazaqstan» gazeti Ordada bastalǵanymen, onyń baspahanasy Oral qalasynda boldy. Ǵumar Qarash, Eleýsin Buırınder gazetti Oralda shyǵaryp, ultqa qyzmet etti. Sondyqtan oblys ortalyǵynan ǵımarat taýyp, Ǵumar Qarash jáne baspasóz mýzeıi dep atap, sol qıly kezeń, azattyqty ańsaǵan Alash qaıratkerleri týraly jádigerlerdi jınaqtasa da, bolar edi. Ǵumar Qarashtyń alda bolar 160, 170 jyldyq mereıtoılaryna ázirlikti erterek bastaý kerek, - dedi J.Safýllın.
Almatyda turatyn ádebıettanýshy ǵalym, jazýshy, fılologııa ǵylymdarynyń kandıdaty Maqsat Tájimurattyń aıtýynsha, Ǵumar týraly sóz qozǵaǵan kezde ustazy, aqyn Sháńgereı Bókeevti umytpaý kerek. Abaı men Shákárim qandaı bolsa, Sháńgereı men Ǵumar da sondaı, ekeýin bir-birinen aıyrýǵa bolmaıdy.
- Elimizde tórt-bes Abaı ınstıtýty, Shákárimtaný ortalyǵy bar. Endeshe, Ǵumar men Sháńgereıdiń murasyn zertteıtin, respýblıkalyq deńgeıde jumys isteıtin Oralda nege ǵylymı-zertteý ortalyǵyn ashpasqa?! Sondaı-aq qaladaǵy keń kóshelerdiń birine ekeýiniń eskertkishin ornatsa, ult mártebesi asqaqtaı túser edi, - dedi M.Tájimurat.
Eske sala keteıik, budan buryn Oralda aqyn Ǵumar Qarashtyń 150 jyldyǵyna arnalǵan músháıra máresine jetkenin jazǵan edik.