Oral qalasynda 116 saıajaı birlestigin sý basty
ORAL. KAZINFORM — Oral qalasynda ózen jaıylmalarynda ornalasqan 116 saıajaı birlestigin sý basty.
BQO ákiminiń orynbasary Qalııar Aıtmuhambetovtiń málim etkenindeı, bul saıajaılarda 2 073 otbasy (6 888 adam) turady.
Qalııar Shadııarulynyń sózine qaraǵanda, kúni búginge deıin oblystyń alty aýdany men Oral qalasynda 1 292 turǵyn úıdi sý bassa, sonyń 902-sine turǵyndar qaıtyp oraldy. 375 úıde eshkim turyp jatqan joq. 15-i bos tur.
«Óńir turǵyndaryna sý tasqyny saldarynan keltirilgen materıaldyq zalaldy baǵalaý jumystary bastaldy. Qazirgi tańda sýǵa ketken úılerdiń 1150-ine tehnıkalyq saraptama júrgizildi. Saraptama qorytyndysyna sáıkes 276 turǵyn úı jaramsyz bolyp tanyldy. 47-si kúrdeli jóndeýge jatady. 590 nysanǵa baǵalaý júrgizildi», - dedi Q.Aıtmuhambetov.
Onyń aıtýynsha, oblys boıynsha 108 mektepte 75 962 oqýshy onlaın bilim alyp jatyr. Aldyn ala sý basqan ýchaskelerden evakýatsııalaý úshin 8 596 oryndyq 161 ýaqytsha ornalastyrý pýnkti daıyndaldy.
Jalpy, sý tasqyny bastalǵannan beri barlyǵy 13 880 adam qaýipsiz jerge kóshirilse, sonyń 5 748-i – bala. Qazirgi tańda 14 evakopýnktte 2 363 adam jatyr. Evakýatsııalyq pýnktter qajetti azyq-túlik, medıtsınalyq kómekpen qamtylǵan.
«Jaıyq ózeni boıynda ornalasqan Oral qalasy men Aqjaıyq, Bórli, Báıterek, Terekti aýdandarynyń 84 eldi mekenine qaýip áli tónip tur. Qalany eseptemegende, bul aýyldarda 80 myńnan astam halyq turyp jatyr. Sáýir aıynan bastap Jaıyq ózeni boıyndaǵy eldi mekenderde uzyndyǵy 135 shaqyrym bıiktigi 2-4,5 metr bógetter turǵyzylýda. 1,1 mln-ǵa jýyq qum salynǵan qapshyq tóseldi. Bógetterdi bekitýge 1 336 arnaıy tehnıka tartylsa, sonyń 861-i – ózge óńirlerden kómekke kelgender. Kúni búgin 7 myńǵa jýyq oblys turǵyndary men jergilikti atqarýshy organ qyzmetkerlerimen qatar 3,5 myńnan astam áskerı qyzmetshiler tasqyn sýmen kúresýde», - dedi Q.Aıtmuhambetov.
BQO TJ departamenti baspasóz qyzmetiniń naqtylaýynsha, kúni búginge deıin 13 044 saıajaı úıi sýǵa ketti. Apattyq-qutqarý jumystaryna 10 647 adam, 1 919 tehnıka, 213 sý sorý quraly, 194 qaıyq jáne 5 tikushaq jumyldyrylǵan.
Eske sala keteıik, budan buryn sý basqan aýmaqtardy qalý qaýipti ekendigin jazǵan bolatynbyz.
Oral qalasynda er adam tasqyn sýmen aǵyp kete jazdady.
Jaıyq ózenindegi sý deńgeıi Oralda 860 santımetrden asty.
