Oral qalasynan Astanaǵa qatynaıtyn ushaq ushpaı qaldy

Búgin Oral qalasynan Astanaǵa qatynaıtyn Air Astana ushaǵy ushpaı qaldy, dep habarlaıdy Kazinform. 

Jolaýshylardyń sózine qaraǵanda, ushaq jergilikti saǵat 16.40-ta ushýy kerek edi.

«Tórt saǵat ushaqtyń ishinde otyrdyq. Áýeli tehnıkalyq aqaýlyq dedi. Odan keıin áýejaı jolaǵyn muz ben qardan tazalaý úrdisi dep aıtty. Aqyry saǵat 20.40 shamasynda avtobýsqa otyrǵyzyp, qaıtadan áýejaıǵa kirgizdi. Basqa ushaqqa otyrǵyzýy múmkin ekenin jetkizdi», - dedi Saltanat esimdi jolaýshy.

«Oral halyqaralyq áýejaıy» JShS baspasóz qyzmeti oqıǵany rastap, Air Astana ushaǵy tehnıkalyq sebepterge baılanysty ushý-qoný jolaǵynan ekinshe ret qaıtyp kelgenin, búgin ushpaıtynyn habarlady.

Eske sala keteıik, budan buryn aýa raıynyń qolaısyzdyǵynan Oralǵa keletin reıster keshigip jatqanyn jazǵan bolatynbyz.