Oral áýejaıy jóndeýge jabylady

Mánshúk Mámetova atyndaǵy Oral halyqaralyq áýejaıy birneshe kúnge jóndeýge jabylady, dep habarlaıdy QazAqparat tilshisi.

«Oral halyqaralyq áýejaıy» JShS baspasóz qyzmetinen málim etkendeı, áýejaıda ushý qaýipsizdigin qamtamasyz etý úshin ushý jolaǵynyń bir bóligine aǵymdaǵy jóndeý júrgiziledi.

«Jóndeý ýaqytynda, ıaǵnı 8 qazan kúni saǵat 02.00-den 10 qazan saǵat 05.00-ge deıingi aralyqta, sondaı-aq 12 qazanda 01.30-dan 17.00-ge deıin (rezervtik kún) áýejaıdy jabý josparlanǵan. Sol kúnderi ushaqtar qabyldanbaıdy jáne ushyrylmaıdy. Bul – áýe kemelerin paıdalaný jáne jolaýshylarǵa qyzmet kórsetý qaýipsizdigin qamtamasyz etýge baǵyttalǵan májbúrli shara. Josparlanǵan jóndeý merzimi sol kezdegi qolaıly aýa raıyn, sondaı-aq áýejaıda ushatyn ushaqtar sanynyń azaıýyn eskere otyryp tańdalyp, Oralǵa reısterdi oryndaıtyn áýe kompanııalarymen kelisildi.

Jolaýshylardan júrgizilip jatqan jumystarǵa túsinistikpen qarap, saparlaryn aldyn ala josparlaýdy ótinemiz», - dep habarlady vedomstvodan.

Eske sala keteıik, budan buryn Oralǵa qonǵan ushaqta 17 jasar qyz kóz jumǵanyn jazǵan bolatynbyz.