OPEK+ munaı óndirý kólemin qyrkúıekte ulǵaıtady

ASTANA. KAZINFORM — OPEK+ alıansynyń segiz eli qyrkúıekte munaı óndirýdi táýligine 547 myń barrelge arttyrady.Bul tórt aıǵa arnalǵan óndiristi kezeń-kezeńimen ulǵaıtý josparyna sáıkes keledi, dep habarlaıdy TASS.

Óndiristi erikti túrde qysqartqan segiz OPEK+ eli qyrkúıek aıynda munaı óndirý kólemin táýligine 547 myń barrelge arttyrý týraly sheshim qabyldady. Bul sheshim tórt aıǵa josparlanǵan óndirý kólemin kezeń-kezeńimen arttyrý josparyna sáıkes keledi. Bul týraly OPEK saıtyna jarııalanǵan qorytyndy málimdemede aıtylǵan.

Málimdemede munaı naryǵyndaǵy oń irgeli faktorlar, atap aıtqanda, qorlardyń tómen deńgeıi aıasynda óndiristi arttyrý týraly sheshim qabyldanǵany taǵy da atap ótildi.

OPEK+ elderiniń keıbiri erikti qysqartýlar kezeńinde shamadan tys óndirgen kólemdi óteý kestesin eskergende, qyrkúıektegi naqty óndiris ósimi táýligine 528 myń barrel.

Qyrkúıektegi bul sheshim OPEK+ quramyndaǵy «segizdikke» óndiristi erikti túrde qysqartý aıasynda belgilengen 2,2 mln barrel/táý. kólemin tolyǵymen qalpyna keltirýge múmkindik beredi — bul bastapqy jospardan bir jyl buryn oryndalady. Alaıda, aldyńǵy sheshimderdi eskersek, óndiristi arttyrý kólemi segiz eldiń qysqartqan kóleminen 302 myń barrel/táý. artyq bolmaq.

OPEK+ alıansynyń qazirgi sheshimine BAÁ-niń kvotasyn táýligine 300 myń barrelge arttyrý da kiredi. Bastapqyda BAÁ bul kólemdi 2025 jylǵy sáýirden bastap 2026 jylǵy qyrkúıek aıynyń sońyna deıin kezeń-kezeńimen arttyrýy tıis bolatyn.

Kezdesý qorytyndysy boıynsha jarııalanǵan málimdemede, OPEK+ quramyndaǵy segiz el aı saıyn kezdesip, naryqtaǵy jaǵdaıdy baǵalaýdy, OPEK+ kelisimi sharttarynyń oryndalýyn jáne shamadan tys óndiristi óteý mindettemeleriniń oryndalýyn baqylaýdy jalǵastyratyny atap ótilgen. Kelesi osyndaı kezdesý 7 qyrkúıekte ótedi.

Aıta ketelik Pákistan alǵash ret AQSh-tan munaı ımporttamaq.