Ońtústikte egis alqaptaryn sýarýǵa josparlanǵan sý kóleminiń 80%-dan astamy alyndy

ASTANA. KAZINFORM - Sýarý maýsymynyń basynan shilde aıynyń sońyna deıin elimizdiń ońtústiginde egis alqaptaryna 8,15 mlrd tekshe metrden astam sý alyndy, dep habarlaıdy QR Sý resýrstary jáne ırrıgatsııa mınıstrliginiń baspasóz qyzmeti.

Basasóz qyzmetiniń málimetterine qaraǵanda, bıyl vegetatsııa kezeńinde jalpy kólemi 10,1 mlrd tekshe metr sý alý josparlanǵan. Osylaısha, sýarý kezeńiniń sońyna deıin taǵy shamamen 2 mlrd tekshe metr sý alynady. Jalpy alynǵan sýdyń shamamen 37,2%-y nemese 3,03 mlrd tekshe metri Qyzylorda oblysyna tıesili. Túrkistan oblysy alǵan sý kólemi – shamamen 37% nemese 3,011 mlrd tekshe metr. Jambyl oblysyna 9,3%-dan astam nemese 761,7 mln tekshe metr, Jetisý oblysyna – 8,8%-dan astam nemese 719,6 mln tekshe metr, al Almaty oblysyna – 7,7%-dan astam nemese 631,4 mln tekshe metr sý berildi.

«Qazaqstannyń ońtústik óńirlerindegi sýarý maýsymynyń barysy mınıstrlik baqylaýynda. Sýdyń ádil bólinýin qamtamasyz etý úshin jergilikti atqarýshy jáne quqyq qorǵaý organdarymen birlesip kanaldar men basqa da obektilerge turaqty monıtorıng júrgizetin tórt jumys toby quryldy. Sonymen qatar sý kezekpen berilip, sharýalar arasynda túngi sýarý jáne egis aınalymyna kóshý boıynsha túsindirý jumystary júrgizilip jatyr», – dedi Sý resýrstary jáne ırrıgatsııa birinshi vıtse-mınıstri Nurlan Aldamjarov.

Bıyl elimizdiń ońtústiginde vegetatsııa kezeńi 20 kúnge erte bastalǵanyn eske sala keteıik. Buǵan joǵary temperatýra men jaýyn-shashynnyń bolmaýy sebep boldy. Soǵan qaramastan, sýarmaly sýdyń erte berilýiniń arqasynda ońtústik óńirlerdiń dıqandary sáýir aıynyń ortasynda alǵashqy qyryqqabat ónimin, mamyrdyń sońǵy onkúndiginde qaýyn-qarbyzdy, maýsymda baklajan men ózge de baqsha daqyldarynyń alǵashqy ónimin jınap úlgerdi.

Osyǵan deıin sý obektilerin halyqty aýyzsýmen qamtamasyz etý kózderine jatqyzý qaǵıdalary bekitilgeni týraly jadyq.