Ońtústik Sýdandaǵy sý tasqynynan 335 myńǵa jýyq adam baspanasynan aıyryldy
ASTANA. KAZINFORM – Ońtústik Sýdanda birneshe aptadan beri tolassyz jaýǵan nóser men Nil ózeniniń tasýy saldarynan júzdegen myń adam úılerin tastap ketýge májbúr boldy, dep habarlaıdy Anadolu.
BUU Gýmanıtarlyq máselelerdi úılestirý basqarmasynyń (OCHA) málimetinshe, shilde aıynda bastalǵan jaýyn-shashyn eldiń alty shtatynda sý tasqynyn týdyrǵan. Tabıǵı apat 26 okrýgti qamtyǵan. Eń kóp zardap shekken óńirler qatarynda Djongleı men ıÝnıtı shtattary bar. Shamamen 335 myń adam baspanasyn tastap, qaýipsiz aımaqtarǵa kóshýge májbúr bolǵan.
Sý tasqynynyń saldarynan 61 mektep zaqymdanǵan. 22 myńnan astam bala men 700-ge jýyq muǵalimniń oqý protsesine qatysýy toqtady. Eldiń kóptegen aýdandarynda medıtsınalyq jáne bilim berý qyzmetteri úzilgen.
BUU dereginshe, sý basqan aımaqtarda aýyzsý tapshylyǵy men juqpaly aýrýlardyń kóbeıýi tirkelgen. Azyq-túlik qaýipsizdiginiń tómendeýi men sanıtarlyq jaǵdaıdyń nasharlaýy gýmanıtarlyq daǵdarysty odan ári kúrdelendirip otyr.
BUU Bosqyndar isi jónindegi Joǵarǵy komıssarynyń (ÝKGB) Ońtústik Sýdandaǵy ókildigi bıylǵy sý tasqynynyń byltyrǵydan áldeqaıda aýqymdy ekenin málimdedi. Uıymnyń baǵalaýynsha, eger jaýyn-shashyn toqtamasa, 1 mıllıonnan astam adam zardap shegip, shamamen 400 myń adam baspanasynan aıyrylýy múmkin.
Halyqaralyq jáne jergilikti gýmanıtarlyq uıymdar qıyn jaǵdaılarǵa, ınfraqurylymnyń buzylýyna jáne qarjylandyrýdyń qysqarýyna qaramastan, zardap shekken aımaqtarǵa azyq-túlik pen dári-dármek jetkizýge tyrysýda. Alaıda bar resýrstar halyqtyń qajettiligin tolyq óteı almaı otyr.
Sarapshylardyń aıtýynsha, bul jaǵdaı sońǵy jyldary jıilep kele jatqan klımattyq ózgeristerdiń saldaryn kórsetedi. Sońǵy tórt jyl qatarynan Ońtústik Sýdan iri sý tasqyndaryna tap bolyp otyr. 2020, 2021 jáne 2022 jyldary eldiń mıllıondaǵan turǵyny úılerinen aıyrylyp, gýmanıtarlyq kómekke táýeldi bolǵan edi.
Klımattyń ózgerýi, ishki qaqtyǵystar men azyq-túlik tapshylyǵy eldegi jaǵdaıdy kúrdelendirip, jańa daǵdarystyń qaýpin arttyryp otyr. Sarapshylar eger bıylǵy sý tasqynynyń áseri aldyńǵy jyldardaǵy apattarmen qabattassa, Ońtústik Sýdan gýmanıtarlyq apattyń shegine jetýi múmkin ekenin eskertedi.
BUU agenttikteri men gýmanıtarlyq seriktester eldiń eń kóp zardap shekken óńirlerinde kómek kórsetýdi jalǵastyryp jatyr. Olar azyq-túlik, dári-dármek jáne ýaqytsha baspana taratý sharalaryn uıymdastyrýda. Degenmen sarapshylar aldaǵy aptalarda jaǵdaıdyń odan ári ýshyǵýy múmkin ekenin aıtady.
Buǵan deıin Meksıkadaǵy sý tasqynynan 75 adam iz-túzsiz joǵalǵany habarlanǵan edi.