Elimiz shegirtkemen jasandy ıntellektiniń kómegimen kúrespek
ASTANA. KAZINFORM — Aýyl sharýashylyǵy mınıstrligi biryńǵaı avtomattandyrylǵan aqparattyq júıeni jáne geoaqparattyq júıeni ázirleý men engizýdi qolǵa almaq. Bul týraly tolyǵyraq Aýyl sharýashylyǵy mınıstriniń orynbasary Ermek Kenjehanuly aıtyp berdi.
Búgin elordada Birikken Ulttar Uıymynyń azyq-túlik jáne aýyl sharýashylyǵy uıymy (FAO) men elimizdiń aýyl sharýashylyǵy mınıstrliginiń uıytqy bolýymen azyq-túlik júıelerin qaıta qurý boıynsha áleýmettik jobalardy talqylaýǵa arnalǵan dóńgelek ústel ótip jatyr.
— Elimiz geografııalyq ornalasýyna baılanysty aýyl sharýashylyǵy daqyldary kóptegen zııankes úshin qolaıly. Atap aıtqanda, el aýmaǵynda úıirli shegirtkeler (azııalyq shegirtke, marokko shegirtkesi, ıtalıandyq prýs) keńinen taralǵan. Osyǵan baılanysty, bizdiń mınıstrlik biryńǵaı avtomattandyrylǵan aqparattyq júıeni jáne geoaqparattyq júıeni ázirleý men engizýge qyzyǵýshylyq tanytyp otyr. Bul júıeler aýyl sharýashylyǵy daqyldaryn qorǵaý jumystaryn ońtaılandyrý jáne eldiń aýyl sharýashylyǵynyń turaqty damýyn qamtamasyz etý úshin qajet. Osy oraıda bizdiń mınıstrlik FAO-dan (BUU azyq-túlik jáne aýyl sharýashylyǵy uıymy) qarjylyq kómek kórsetý múmkindigin qarastyryp, jasandy ıntellekti qoldanatyn aqparattyq júıeler men tehnologııalardy «Jerdiń tozýy» jobasyna komponentter retinde engizýdi surap otyrmyz, — dedi Ermek Kenjehanuly elordada ótip jatqan aýyl sharýashylyǵy salasyn damytýǵa arnalǵan dóńgelek ústel barysynda.
Sondaı-aq vıtse-mınıstr tsıfrlyq tehnologııalardy mal sharýashylyǵy salasyna da engizýge erekshe mán beriletinin málim etti.
— Ǵalamdyq azyq-túlik qaýipsizdigi men halyqaralyq naryq talaptaryna baılanysty, qadaǵalaý júıesin damytý salanyń turaqty damýynyń negizgi elementine aınalyp otyr. Sońǵy jyldary Qazaqstan tsıfrlyq sheshimderdi belsendi túrde engizip, mal esebiniń ashyqtyǵy men tıimdiligin, olardyń jaı-kúıin, veterınarlyq qaýipsizdigi men ónim qozǵalysyn baqylaýdy qamtamasyz etip otyr. Mal sharýashylyǵynyń barlyq tsıklin qamtıtyn elektrondyq júıeler ázirlenip, engizilip jatyr. Alaıda, jańashyldyqty odan ári damytyp, keńeıtý úshin halyqaralyq tájirıbeni tartý qajet, osy oraıda BUU-nyń azyq-túlik jáne aýyl sharýashylyǵy uıymymen yntymaqtastyq mańyzdy ról atqarady. Halyqaralyq uıymdy mal sharýashylyǵyn qadaǵalaý júıesin jetildirý jáne keńeıtý boıynsha strategııalyq seriktes retinde qarastyramyz, — deıdi ol.
Aýyl sharýashylyǵy mınıstrligi men BUU azyq-túlik jáne aýyl sharýashylyǵy uıymy kelesi baǵyttar boıynsha birlesip jumys istemek:
— Ozyq halyqaralyq tájirıbeni ulttyq jaǵdaıǵa beıimdeý;
— Normatıvtik-quqyqtyq bazany jetildirý;
— Blokcheın men jasandy ıntellekt sekildi ınnovatsııalyq tehnologııalardy engizý;
— Aqparattyq júıelerdi biryńǵaı tsıfrlyq ekojúıege biriktirý;
Buǵan deıin habarlaǵanymyzdaı elimizde aýyl sharýashylyǵy ónimderin qaıta óńdeýdi damytýdyń keshendi jospary qabyldandy.
Aıta keteıik, byltyr aýyl sharýashylyǵy ónimderi kólemi 13,7%-ǵa artyp, sala úshin rekordtyq maýsym boldy.