Ońtústik Koreıada JI qaýipsizdigi týraly zań kúshine endi

ASTANA. KAZINFORM — Bul «Jasandy ıntellektti damytý jáne oǵan senim qalyptastyrý negizderi týraly negizgi zań» týraly qujat, dep habarlaıdy Yonhap.

Qujat jasandy ıntellekttiń damýyna baılanysty týyndaıtyn dezınformatsııa jáne basqa da yqtımal táýekelderge qarsy is-qımyl jasaýǵa arnalǵan normatıvtik bazany qalyptastyrady.

Eldiń Ǵylym mınıstrliginiń málimetinshe, úkimet ulttyq deńgeıde jasandy ıntellektti paıdalaný boıynsha keshendi nusqaýlyqtardy bekitken. Zań dıpfeıkter men JI-modelder arqyly jasalýy múmkin dezınformatsııamen kúreste kompanııalar men ázirleýshilerdiń jaýapkershiligin arttyrýǵa baǵyttalǵan. Sondaı-aq, úkimetke tekserý júrgizý jáne zań buzýshylyqtar úshin aıyppul salý ókilettigin beredi.

Qujatta «joǵary táýekeldi jasandy ıntellekt» uǵymy engiziledi. Oǵan adamdardyń kúndelikti ómirine nemese qaýipsizdigine eleýli áser etýi múmkin kontentti jasaıtyn JI-modelder jatady. Buǵan jumysqa ornalastyrý, kredıttik baǵalaý jáne medıtsınalyq keńes berý salalary kiredi.

Mundaı joǵary táýekeldi JI-modelderdi qoldanatyn uıymdar paıdalanýshylardy qyzmettiń jasandy ıntellektke negizdelgeni týraly habardar etýge jáne olardyń qaýipsizdigine jaýap berýge mindetti. Sonymen qatar, JI arqyly jasalǵan kontent onyń jasandy jolmen qurylǵanyn kórsetetin sýtańbamen (watermark) belgilenýi tıis.

— Jasandy ıntellekt arqyly jasalǵan kontentti tańbalaý — dıpfeık jasaý sııaqty tehnologııalardy teris paıdalanýdyń aldyn alýǵa arnalǵan eń tómengi qaýipsizdik sharasy, — dedi mınıstrlik ókili.

Ońtústik Koreıada JI qyzmetterin kórsetetin jáne tómendegi talaptardyń kem degende birine saı keletin jahandyq kompanııalar jergilikti ókil taǵaıyndaýǵa mindetti:

• jyldyq jahandyq tabysy 1 trln vonnan (shamamen $681 mln) asatyndar;

• el ishindegi satylymy 10 mlrd vonnan joǵary;

• elde kúnine keminde 1 mln belsendi paıdalanýshysy barlar.

Qazirgi ýaqytta bul talaptarǵa OpenAI men Google sáıkes keledi.

Zań talaptaryn buzǵany úshin 30 mln vonǵa deıin aıyppul qarastyrylǵan. Sonymen qatar, úkimet jeke sektorǵa jańa talaptarǵa beıimdelý úshin bir jyldyq ótpeli kezeń engizýdi josparlap otyr. Zańda jasandy ıntellekt ındýstrııasyn damytýǵa qoldaý kórsetý sharalary da qamtylǵan. Ǵylym mınıstri ár úsh jyl saıyn JI salasyndaǵy jańartylǵan memlekettik jospardy usynýǵa mindetti.

Aıta keteıik, Qazaqstanda da «Jasandy ıntellekt týraly» jańa zań kúshine endi.