Ońtústik Koreıada úsh óńirdegi orman órtine baılanysty tótenshe jaǵdaı engizildi

ASTANA. KAZINFORM – Іshki ister jáne qaýipsizdik mınıstrligi 4 adam qurban bolǵan úsh óńirdegi orman órti tabıǵı apatyna baılanysty tótenshe jaǵdaı jarııalady, dep habarlaıdy reseılik TASS.

Vedomstvonyń saıtynda osyndaı aqparat jarııalandy.

- Іshki ister mınıstrligi Kensan-Namdo provıntsııasyndaǵy Sanchhon ýezin qosa alǵanda eldiń aımaqtaryndaǵy órt oqıǵalarynyń saldarynan orasan shyǵyn kelýine baılanysty 22 naýryz kúni saǵat 18:00-den bastap Ýlsan qala-metropolııasynda, Kensan-Pýkto men Kensan-Namdo provıntsııalarynda barlyq vedomstvolardyń kúshin biriktirý úshin tótenshe jaǵdaı jarııalandy, - delingen habarlamada.

Ońtústikkoreıalyq BAQ ókilderiniń habarlaýynsha, órt saldarynan 4 órt sóndirýshi mert boldy. Jergilikti turǵyndy qosa alǵanda 6 adam iz-túzsiz ketken.

Yonhap agenttiginiń málimetterine qaraǵanda, kórshiles aýyldardan 50 adam evakýatsııalanǵan. 260 adam baspanalarynan aıyrylyp, ýaqytsha ornalasý oryndarynda turyp jatyr.

Órt juma kúni keshkisin Sanchhon ýezinde bastaldy. Jergilikti ýaqyt boıynsha saǵat 10:30-da órt oshaqtarynyń 70% sóndirilgen. Alaıda artynan kúshti jel turyp, kórsetkish 35%-ke túsip qaldy.

Órtengen aımaqtarda temirjol men joldardaǵy qozǵalys toqtady. Tótenshe jaǵdaı bolǵan aımaqtarǵa Koreıa Respýblıkasy prezıdentiniń mindetin atqarýshy Chhve San Mok baryp qaıtty. Ol órtti sóndirý úshin barlyq qajetti mamandar men quraldardy jumyldyrýdy tapsyrdy. Chhve San Mok tótenshe jaǵdaı jarııalaý qajet dedi.

Osyǵan deıin Ońtústik Koreıada salynyp jatqan kópirdiń opyrylyp túskeni týraly jazdy.