Ońtústik Koreıada neke qurý kórsetkishi eki jyl qatarynan ósip keledi
ASTANA.KAZINFORM — Ońtústik Koreıada 2024 jyly neke qurý sany aıtarlyqtaı artty. Bul óz kezeginde týý sanynyń ósýine ákeldi, dep habarlaıdy Yonhap.
Koreıa statıstıkasynyń málimetinshe, ótken jyly neke qurǵan juptar sany 222,4 myńǵa jetti.
Bul kórsetkish 1996 jyly 430 myńǵa jetken soń qaıta tómendep, 2022 jyly 192 myń rekordtyq kórsetkishke jetken.
Agenttik 2024 jyly týǵandar sanynyń 238 myń bolǵanyn, bul 2023 jylǵy rekordtyq tómengi kórsetkishten sál joǵary ekenin aıtty. 2024 jylǵy kórsetkishke deıin 715 myń sábı dúnıege kelgen.
Vedomstvo jańa týǵan náresteler sanynyń kóbeıýin COVID-19 pandemııasynan keıin nekege turýdy tirkeýdiń qalpyna kelýimen túsindiredi. Nekesiz týý sırek kezdesetin Ońtústik Koreıada neke dınamıkasy týý kórsetkishine tikeleı áser etedi.
— Ósimge qaramastan, 2024 jyly týǵandar sany 1995 jylǵy deńgeıdiń shamamen 33 paıyzyn ǵana quraıdy, — dep atap ótti vedomstvo.
Alǵashqy nekege turýdyń ortasha jasy da turaqty ósip keledi. 2024 jyly ol erler úshin 33,9, áıelder úshin 31,6 boldy.
Sheteldiktermen neke qurý 2005 jyly sharyqtaý shegine jetti, keıin tómendedi, biraq 2022 jyly qaıtadan óse bastady.
Tuńǵysh balasyn týǵan analardyń ortasha jasy 1995 jyly 27,9 bolsa, 2024 jyly 33,7 jasty qurady.
Biz budan buryn Koreı túbegi halyq sany ınstıtýty bergen málimetterge sáıkes, 100 jyldan keıin Ońtústik Koreıa halqy qazirgi 51,68 mıllıonmen salystyrǵanda 7,53 mıllıon adamǵa deıin tómendeýi múmkin ekenin jazǵanbyz. Bul 9,3 mıllıonnan astam adam turatyn Seýldiń qazirgi turǵyndarynan az.
Aıta ketelik Ońtústik Koreıanyń burynǵy birinshi hanymy aktsııalar baǵasyn qoldan jasady dep aıyptaldy.