Ońtústik Koreıa men Frantsııa Ormýz buǵazyndaǵy baqylaýdy kúsheıtedi
ASTANA. QazAqparat – Ońtústik Koreıa men Frantsııa Ormýz buǵazy arqyly kemelerdiń qaýipsiz ótýin qamtamasyz etý jáne álemdik energetıkalyq qaýipsizdikke tónetin qaterlerdi azaıtý baǵytynda birlesken sharalar qabyldaýǵa kiristi, dep habarlaıdy Yonhap.
Eki el prezıdentteri Lı Chje Men men Emmanýel Makron Seýlde teńiz baǵyttaryndaǵy is-qımyldy úılestirý, munaı men gaz jetkizilimderiniń turaqtylyǵy, sondaı-aq energetıka, atom jáne jel energetıkasy, joǵary tehnologııalar men halyqaralyq saýda salalaryndaǵy yntymaqtastyqty keńeıtý máselelerin talqylady.
Bul – Makronnyń 2017 jyly qyzmetine kiriskennen bergi Ońtústik Koreıaǵa alǵashqy sapary jáne sońǵy 11 jyldaǵy Frantsııa prezıdentiniń elge jasaǵan alǵashqy resmı sapary. Sapar eki memleket arasyndaǵy dıplomatııalyq qatynastardyń ornaǵanyna 140 jyl tolýyna oraı uıymdastyryldy.
Taraptar Ormýz buǵazy arqyly kemelerdiń qaýipsiz qozǵalysyn qamtamasyz etý jáne jahandyq energetıkalyq qaýipsizdik pen álemdik ekonomıka úshin táýekelderdi tómendetý maqsatynda kúsh-jigerdi úılestirýge kelisti.
Memleket basshylary aımaqtaǵy shıelenisti báseńdetý jáne energııa resýrstaryn jetkizý tizbegindegi irkilisterge jol bermeý úshin halyqaralyq qaýymdastyqpen birlese áreket etýge daıyn ekenin bildirdi. Sondaı-aq turaqsyz geosaıası ahýal jaǵdaıynda týyndaıtyn syn-qaterlerge birlesken jaýap sharalaryn ázirleýdiń mańyzdylyǵy ataldy.
Qaýipsizdik máselelerimen qatar, taraptar energetıka salasyndaǵy, onyń ishinde atom energetıkasy men ofshorlyq jel energetıkasy jobalary boıynsha, sondaı-aq joǵary tehnologııalyq salalarda – jasandy ıntellekt, jartylaı ótkizgishter, kvanttyq tehnologııalar jáne ǵarysh ındýstrııasy baǵyttarynda yntymaqtastyqty keńeıtý nıetin rastady.
Saýda-ekonomıkalyq baılanystardy damytýǵa da erekshe nazar aýdaryldy. Kóshbasshylar 2030 jylǵa qaraı ózara saýda aınalymyn 20 mıllıard dollarǵa deıin jetkizý maqsatynda saýda men ınvestıtsııa kólemin ulǵaıtýǵa ýaǵdalasty.
Sondaı-aq mańyzdy mıneraldardy jetkizý tizbegi boıynsha yntymaqtastyq jáne birlesken energetıkalyq jobalardy iske asyrý jónindegi kelisimderdi qosa alǵanda, birqatar qujattarǵa qol qoıyldy.
Eske sala keteıik, halyqaralyq sammıtte 40-tan astam memleket Ormýz buǵazyndaǵy baǵyttardy tikeleı áskerı shıelenissiz qalpyna keltirý múmkindigin talqylady.