Ońtústik Afrıkada qar jaýyp, tasqynnan jeti adam qaza tapty
ASTANA.KAZINFORM – Ońtústik Afrıka Respýblıkasynda (OAR) qolaısyz aýa raıy saldarynan birneshe óńirde joldar jabylyp, elektr qýaty óshti. Shyǵys Kap provıntsııasynda sý tasqyny mektep avtobýsyn aǵyzyp áketken.
BBC málimetinshe, OAR birqatar aýmaǵynda jaýǵan qar men nóser jaýynnan keıin tótenshe jaǵdaı qalyptasyp otyr. Tabıǵattyń tosyn minezinen ásirese Shyǵys Kap jáne Kvazýlý-Natal provıntsııalary kóp zardap shekti.
Shyǵys Kap óńirinde mektep oqýshylaryn tasymaldap bara jatqan avtobýs tasqyn sýǵa aǵyp ketken. Qutqarýshylar ázirge úsh oqýshyny tirideı tapqan. Avtobýstaǵy basqa balalar týraly naqty aqparat joq. Qutqarý jumystary túnde toqtap, tańǵy ýaqytta qaıta jalǵasty.
Sondaı-aq, O. R. Tambo aýdanynda jeti adamnyń qaza tapqany belgili boldy. Al Ist-London qalasy mańynda qulaǵan aǵashtan jaltarmaq bolǵan júrgizýshi basqarý júıesin ıgere almaı, mıkroavtobýs aýdarylyp ketken.
Qarly boran men tolassyz jaýyn saldarynan elde 500 myńǵa jýyq turǵyn úı jaryqsyz qalǵan. Joldarda qozǵalys tejelip, júk kólikteri men jeńil kólikter uzyn-sonar kepteliste tur. Kvazýlý-Natal men Shyǵys Kap provıntsııalarynda kúre joldardyń keı bóligi ýaqytsha jabyldy.
Mamandardyń aıtýynsha, maýsym men tamyz aralyǵynda qys mezgili bolatyn Ońtústik Afrıka úshin jaýyn men qar tańsyq qubylys emes. Alaıda sońǵy jyldary klımattyń ózgerýine baılanysty tabıǵı apattardyń jıiligi men qarqyndylyǵy aıtarlyqtaı artyp otyr.
Eske salaıyq, Qazaqstan Afrıka elderimen baılanysty kúsheıtýge basa mán beretinin habarlaǵanbyz.
Sonymen qatar, Prezıdent Ońtústik Afrıka Respýblıkasyn Bostandyq kúnimen quttyqtaǵanyn jazǵanbyz.