Ońtústiktiń 1000 ónerpazy elordada ótetin mádenıet kúnderine qatysady
Elorda tórindegi aıtýly sharaǵa kúngeıden 1000 ónerpaz attanbaq. Qazir óńirdiń mádenıet qyzmetkerleri daıyndyqtaryn pysyqtaýda, dep habarlaıdy «QazAqparat HAA tilshisi.
Oblystyq mádenıet basqarmasynyń basshysy Nurbolat Ahmetjanovtyń aıtýynsha «EKSPO-2017» Halyqaralyq mamandandyrylǵan kórmesi aıasynda Astanadaǵy Ońtústik Qazaqstan oblysynyń mádenı kúnderinde 40-tan asa kontserttik baǵdarlamalar men túrli is-sharalar kórermenderin tánti etedi. Jumat Shanın atyndaǵy akademııalyq qazaq drama teatry, oblystyq ázil-syqaq jáne satıra teatry, oblystyq opera jáne balet teatry syndy mádenıet jáne óner mekemeleri aıtýly kúnderde jańa nómirlerin tartý etse, ot aýyz, oraq tildi aqyndar aıtysy da sóz saıysymen sýsyndatady.
Al, oblystyq Ońtústikfılm mekemesi atalǵan kıno ortalyqpen birlese túsirgen «Erlik» kórkem fılmi men «Qazaq eli», «Tolaǵaı» anımatsııalyq fılmderin jáne «Maıdangerler», «Jastyq shaq», «Ótelmes borysh» qysqametrajdy fılmderin Astanadaǵy kórermender nazaryna usynbaq nıette. «Qajymuqan» fılminiń jańa túsirilimi de kórme barysynda tusaýy kesilmek.
Sondaı-aq, «Tomırıs» atty tarıhı-teatrlandyrylǵan tsırktik qoıylymǵa Ońtústik-Tsırk mekemesi de daıyndyq ústinde. Saqtar zamanyndaǵy Tumar (Tomırıs) hanshaıymy men Kır patshasynyń arasyndaǵy baılanys, qaqtyǵys, qaqtyǵystyń sheshilýi jańa tsırktik nómirler arqyly kórermenge jol tabady.
Budan bólek, Shámshi Qaldaıaqov atyndaǵy oblystyq fılarmonııa ujymy Súgir atyndaǵy qazaq ult - aspaptar orkestri «Ońtústiktiń 100 kúıi» atty óńirden shyqqan kúıshi, kompozıtorlardyń týyndylarynan kontserttik baǵdarlama usynǵaly otyr. Sonymen qatar, qazaq valsiniń koroli, uly kompozıtor Shámshi Qaldaıaqov pen Seıdolla Báıterekovtiń ánderinen kontserttik kesh uıymdastyrý josparlanýda.
