Ońtústik jastary latyn álipbıine kóshýdi qoldaıdy
«Elbasy Nursultan Ábishuly Nazarbaev 2025 jyldan bastap, latyn álipbıin qoldanysqa engizý kerektigin aıtty. Búgingi kompıýter zamanynda ınternet júıesinde ústemdik etetin latyn álipbıi ekendigin moıyndaýymyz kerek. Latynǵa kóshkenimizde utatyn tustarymyz bar», deıdi OQO jastar saıasaty máseleleri basqarmasynyń basshysy Balmarjan Narbekova.
Onyń pikirinshe, birinshiden, bul til tazalyǵy máselesine qatysty. Tilimizdegi qazirgi jat dybystardy tańbalaıtyn áripterdi qysqartyp, sol arqyly qazaq tiliniń tabıǵı taza qalpyn saqtaýǵa múmkindik alamyz. Ekinshiden, qazaq tilin oqytqan ýaqytta basy artyq tańbalarǵa qatysty emle, erejelerdiń qysqaratyny belgili. Ol mektepten bastap barlyq oqý oryndarynda oqytý úrdisin jeńildetedi. Ýaqyt ta, qarjy da únemdeledi. Úshinshiden, latyn álipbıine kóshý - qazaq tiliniń halyqaralyq dárejege shyǵýyna jol ashady. Qazaq tiline kompıýterlik jańa tehnologııalar arqyly halyqaralyq aqparat keńistigine kirigýge tıimdi joldar ashylady.
«Tórtinshiden, túbi bir túrki dúnıesi, negizinen, latyndy qoldanady. Bizderge olarmen rýhanı, mádenı, ǵylymı, ekonomıkalyq qarym-qatynasty, tyǵyz baılanysty kúsheıtýimiz kerek. Ol da tabıǵı is ekendigin aıtqymyz keledi», - dep atap ótti Balmarjan Narbekova.
«Qazaq eli táýelsizdik alǵanyna jıyrma altynshy jylǵa aıaq basty. Búgingi jastar elimizdiń órkendegenin, jyldan-jylǵa damyp kele jatqandyǵyn kórip otyr. Olar azat rýhta tárbıelenip, ózderiniń baı tarıhyna maqtana alatyndaı sezimde boı túzeýde.», - deıdi OQO jastar ortalyǵynyń dırektory Bereke Dúısebekov
Onyń pikirinshe, otarshyldyq sanada emes, táýelsizdik rýhtaǵy qazirgi qazaq jastary ultyn súıetin patrıottyq sezimde qalyptasyp keledi.
«Biz jastar latyn álipbıine kóshe otyryp, órkenıetti elderdiń qataryna qosylyp, tilimizdegi dybystyq júıelerdi naq anyqtap, qazaq tiliniń jazylýy men dybystalý kezinde sózder qoldanysyndaǵy artyq kirme sózderden arylamyz dep senimmen aıta alamyz. Latyn álipbıine kóshý- biz jastar úshin, bolashaq elimiz úshin áldeqaıda mańyzdyraq!», - dep atap ótti B. Dúısebekov.
