Ońtústik Koreıa dalada maskasyz júrýge ruqsat beriledi

SEÝL. QazAqparat – Ońtústik Koreıa bıligi 2 mamyrdan bastap ashyq aýada maska taǵý mindetiniń kúshin joıady, biraq áleýmettik qashyqtyq saqtaý qajet. Mundaı málimdemeni el premer-mınıstri Kım Bý Gem jasady, dep habarlaıdy QazAqparat menshikti tilshisi.

Ońtústik Koreıada taza aýada maska taǵý mindeti 2020 jyldyń qazanynda epıdemıologııalyq jaǵdaıdyń órshýine baılanysty engizildi. Maska rejımin buzǵandarǵa ákimshilik aıyppul salyndy.

Jańa erejege sáıkes, eger dalada áleýmettik qashyqtyq múmkin bolmasa, onda maska taǵýǵa keńes beriledi.

Alaıda, 50-den astam adam qatysatyn qoǵamdyq, sporttyq jáne mádenı sharalarda ashyq aýada maska taǵý mindetti.

Ońtústik Koreıa COVID-19 juqtyrǵandar sanynyń azaıýyna baılanysty koronavırýsqa deıingi ómirge qaıta oralyp jatyr.