Óńirlik kadr rezervterine irikteý: 11,5 myń ótinim berildi

ASTANA. KAZINFORM — Keıingi jyldary memlekettik qyzmet salasynda biraz ózgeris boldy. Sybaılas jemqorlyq qylmystaryna jazany kúsheıtý boıynsha birqatar zańnamalyq norma qabyldandy. Sonymen qatar, 2022 jyly Memleket basshysy Qasym-Jomart Toqaev depýtattar men ákimderdiń eńbekaqysyn kóterýge besjyldyq moratorıı jarııalady. Atap aıtqanda, qazir memlekettik qyzmettegi áıelderdiń úlesi 56% bolsa, jastardyń úlesi – 35,2%, ortasha jas – 40,2, sondaı-aq sheteldik JOO-nyń túlekteri 3 myń adamǵa jetti.

Túlekterdi qyzmetke konkýrs ótkizbeı-aq taǵaıyndaý

QR Memlekettik qyzmet isteri agenttigi tóraǵasynyń orynbasary Azamat Jolmanovtyń aıtýynsha, elimizde qyzmetke irikteýdiń ashyqtyǵyn qamtamasyz etý maqsatynda memlekettik qyzmetti tsıfrlandyrý boıynsha jumys jalǵasyp jatyr. Agenttik jańa irikteý qaǵıdalaryn ázirlep, «eqyzmet.gov.kz» syrtqy ınternet-portalyn iske qosty.

«2023 jyldyń 1 naýryzynan oǵan 6 memlekettik organ qanatqaqty rejımde qosylǵan edi, al qazirgi kezde 22 memlekettik organda júzege asyrylyp keledi. Óz kezeginde, osy jyldyń 1 shildesinen bastap qosymsha 22 memlekettik organ bul tizimge engiziledi. Jańa jobanyń ereksheligine toqtalsaq, azamattar konkýrstyń barlyq kezeńderine onlaın túrde qashyqtan, ınternetke qoljetimdi kez kelgen jerden jáne qalaǵan ýaqytynda qatysa alady. Taraptardyń arasynda múddeler qaqtyǵysy men sybaılas jemqorlyq táýekelderin boldyrmaý úshin memlekettik organdarda úmitkerlerdiń irikteý kezeńderinen ótý kezinde anonımdilikti qamtamasyz etýge júıemen berilgen sáıkestendirý nómiri usynylady. Sondaı-aq «adamı faktordyń» yqpalyn boldyrmaý úshin konkýrs rásiminiń ashyqtyǵyn táýelsiz proktorıng júıesi (onlaın testileýdi qaraý jáne baqylaý quraly) qamtamasyz etedi jáne konkýrs jeńimpazy barlyq kezeń qorytyndysy boıynsha aqparattyq júıemen derbes aıqyndalady», - dedi A. Jolmanov.

Nátıjesinde, jańa joba boıynsha ótkizilip jatqan konkýrstarda bir orynǵa qatysatyndardyń úlesi 4,6 adamǵa deıin artty. ıAǵnı qoldanystaǵy (1,7 adam) irikteý tártibimen salystyrǵanda, qatysatyndardyń sany 2,7 esege ósti. Bul óz kezeginde azamattardyń jańa joba aıasynda memlekettik qyzmetke qyzyǵýshylyǵy birshama artqanyn kórsetti.

Sonymen qatar, Memleket basshysy memlekettik qyzmetke kirýdegi artyq kedergilerdi joıý jónindegi tapsyrmasyn iske asyrý boıynsha da jumys jalǵasyp keledi. Birinshiden, memlekettik tapsyrys aıasynda bilim alǵan túlekterdi memlekettik qyzmetke tartý jónindegi ózgerister óńirlerdegi uzaq ýaqyt bos turǵan oryndardy áleýeti joǵary jas mamandarmen tolyqtyrýǵa múmkindik beredi. Memlekettik basqarý akademııasynyń túlekterin óńirlerdegi laýazymdarǵa, joǵary oqý oryndaryn memlekettik grantpen ári jaqsy kórsetkishpen (GPA 3,33-ten tómen emes) bitirgen túlekterdi aýdan jáne aýyldyq jerlerdegi tómengi laýazymdarǵa konkýrssyz tikeleı taǵaıyndaý múmkindigi qarastyryldy.

Nátıjesinde, jańashyldyqqa baılanysty elimizde oqý kórsetkishi 3,33 baldan tómen emes bitirgen 203 maman qyzmetke konkýrs ótkizilmesten ornalasty.

Ekinshiden, engizilgen jańashyldyqtar aıasynda ortalyq memlekettik jáne jergilikti atqarýshy organdardyń jekelegen basshylyq laýazymdaryna konkýrs ótkizbesten ornalasý tetigi belgilendi. Atap aıtqanda, Agenttik byltyrdan 442 úmitkerdiń taǵaıyndalýyna kelisim berdi.

Óńirlerge talant jastardy tartý

2019 jyly Memleket basshysynyń bastamasymen merıtokratııa jáne ashyq irikteý qaǵıdattary negizinde memlekettik qyzmetke jas, talant jáne perspektıvti mamandardy tartý maqsatynda Prezıdenttik jastar kadr rezervin qalyptastyrý jumystary bastaldy. Bul – memlekettik apparat jumysyna jańa tásilder engize alatyn daryndy jastarǵa arnalǵan áleýmettik lıft.

Bıyl mamyr aıyndaǵy málimetke qaraǵanda, Prezıdenttik jastar kadr rezervinde 400 adam (2019 jyly – 300 rezervshi, 2021 jyly – 50 rezervshi, 2023 jyly – 50 rezervshi) bar, onyń ishinde 291 adam jumysqa ornalastyrylǵan. Ortalyq memlekettik organdarǵa – 153 rezervshi, jergilikti atqarýshy organdarǵa – 36, ulttyq kompanııalarǵa – 58, ózge de jáne jeke uıymdarǵa – 44 rezervshi taǵaıyndaldy. Onyń ishinde, 3 rezervshi – depýtat, 36 rezervshi – saıası laýazymda, 3 rezervshi «A» korpýsynyń laýazymdarynda qyzmet atqaryp jatyr.

Memleket basshysynyń tapsyrmasyn iske asyrý aıasynda «Qazaqstan Respýblıkasynyń memlekettik qyzmeti týraly» Zańǵa oblystardyń, respýblıkalyq mańyzy bar qalalardyń, astananyń óńirlik kadr rezervteri ınstıtýtyn engizýdi kózdeıtin ózgerister jasaldy. Óńirlik kadr rezervine kandıdattardy irikteý óńirlerdi damytýdyń ereksheligi men basymdyqtaryn eskeredi jáne 7 baǵyt sheńberinde júzege asyrylady (ındýstrııa jáne ónerkásip, ekonomıka jáne qarjy, áleýmettik sala, turǵyn uı-kommýnaldyq sharýashylyǵy jáne ınfraqurylym, agroónerkásip kesheni jáne jer qatynastary, tsıfrlandyrý jáne ekologııa). Sonymen qatar, rezervshilerdiń naqty salalyq baǵyttary men sanyn óńirdegi áleýmettik-ekonomıkalyq jaǵdaıdy jáne memlekettik basqarý júıesin damytýdyń basymdyqtaryn eskere otyryp, óńirlik kadr komıssııalary aıqyndaıdy.

«Іrikteýge qatysýǵa barlyǵy 11505 ótinim berildi. Qujattardy zerdeleý qorytyndysy boıynsha zańnamany bilý testileýine 5354 adam, jeke qasıetterin baǵalaýǵa 2433 adam jiberildi. Quzyretin baǵalaýǵa 939 adam keldi. Óńirlik kadr rezervine alynǵan adamdar ýákiletti organmen nemese onyń aýmaqtyq bólimshesimen kelisim boıynsha jergilikti atqarýshy organdardyń «B» korpýsynyń memlekettik ákimshilik laýazymdaryna konkýrs ótkizbeı-aq ornalasa alady. Osylaısha, óńirlik rezerv, eń aldymen, jergilikti atqarýshy organdarǵa joǵary bilikti mamandardy tartýǵa baǵyttalǵan», – dedi Azamat Jolmanov.

Jylda 25,5 myń adam qaıta daıarlaýdan ótedi

Memlekettik qyzmetshilerdiń quzyretin únemi jańartyp, jetildirýge erekshe nazar aýdarylyp otyr. Memlekettik apparatty kásibılendirý maqsatynda Memlekettik basqarý akademııasy joǵary oqý ornynan keıingi bilim berý baǵdarlamalary boıynsha oqytýdy iske asyrady. Dáris oqýǵa otandyq sarapshylarmen qatar, sheteldik jetekshi sarapshylar, memlekettik basqarý jáne dıplomatııalyq qyzmet mamandary tartylady. Bıyl magıstratýra jáne doktorantýra baǵdarlamalary boıynsha oqýdy 134 memlekettik qyzmetshi aıaqtaıdy.

«Jobalyq qyzmetke tartylǵan qyzmetshilerdi turaqty negizde oqytý jáne sertıfıkattaý jalǵasyp keledi. Qazir sertıfıkattalǵan jobalyq menedjerlerdiń jalpy sany 3 189 adamǵa jetti. Budan basqa, jyl saıyn 25,5 myńǵa jýyq memlekettik qyzmetshi qaıta daıarlaýdan ótedi. Memlekettik qyzmetshilerdiń turaqty jumys ornynan tys jerde kásibı bilim men tájirıbe alý maqsatynda olardyń taǵylymdamasy ótkiziledi. Memlekettik qyzmetshiler taǵylymdamadan tek memlekettik organdarda ǵana emes, sonymen qatar ulttyq kompanııalar men memlekettik emes sektor kásiporyndarynda da óte alady (bes kúnnen bir aıǵa deıingi merzimge). Osy jyldyń 1 sáýirindegi jaǵdaı boıynsha taǵylymdamadan 329 qyzmetshi ótti», - dedi A. Jolmanov.

Sonymen qatar, memlekettik qyzmettiń tartymdylyǵyn arttyrý jáne memlekettik organdardyń utymdy qurylymyn qalyptastyrý boıynsha jumystar jalǵasyp otyr.

Birinshiden, basqa eldi mekenge rotatsııalanǵan qyzmetshige turǵyn úıdi jalǵa alýǵa arnalǵan tólem jasalady.

Ekinshiden, aýyldar, kentter jáne aýyldyq okrýgter ákimderiniń aparattarynda jumys isteıtin memlekettik qyzmetshilerdi áleýmettik qoldaý maqsatynda «Dıplommen aýylǵa!» baǵdarlamasy iske asyrylyp jatyr.

Úshinshiden, «B» korpýsy qyzmetshileriniń qyzmetin baǵalaýdyń jańa formaty toqsan saıyn tıimdilikti ólsheýdiń ozyq quraldaryn paıdalana otyryp júrgiziledi (KPI, saralaý). Baǵalaýdyń jańa formaty qurylymdyq bólimsheniń/memlekettik organnyń basshysy úshin nysanaly maqsatty ındıkatorlarǵa qol jetkizý negizinde júzege asyrylady. Budan basqa, tórt toqsan qatarynan neǵurlym joǵary baǵa alǵan qyzmetshilerdi aýystyrý tártibimen kelesi joǵary sanattaǵy laýazymǵa tikeleı taǵaıyndaý eskerilgen. 2023 jyldyń qorytyndysy boıynsha 130 memlekettik qyzmetshi laýazymynda joǵarylady.

Tórtinshiden, memlekettik qyzmettegi kelisimsharttyq qyzmetshiler ınstıtýty engizildi. Osyǵan baılanysty Úkimettiń «Kelisimsharttyq qyzmetshilerdi tartý qaǵıdalaryn, kelisimsharttyq qyzmetshiler tartylatyn jobalardyń túrlerin, eńbekke aqy tóleý sharttary máselelerin jáne olardyń qyzmetin retteýdiń ózge de máselelerin bekitý týraly» qaýlysy qabyldandy. Kelisimsharttyq qyzmetshiler memlekettik organdarǵa ulttyq jáne basqa da jobalardy iske asyrý úshin tartylýy múmkin.