Óńirlerde taýar nesıesi retinde qansha úı janýary berildi
ASTANA. KAZINFORM – Premer-Mınıstrdiń orynbasary Serik Jumanǵarın Májilis depýtattarynyń saýalyna oraı taýar nesıesi retinde qansha úı janýary berilgenin aıtty.
- Oblys ákimdikteriniń málimetine sáıkes, búgingi kúni jol kartasy (Aýyldyq eldi mekender men shaǵyn qalalarda taýarlyq kredıtterdi berý tetigin iske asyrý jónindegi jol kartasy) aıasynda óńirlerde 309 jylqy, 6 túıe, 3 261 iri qara mal jáne 4,7 myńnan astam usaq mal taýar nesıesi retinde úlestirilgen. Jalpy taýar nesıesin berý tetigi jol kartasy aýqymynda oblys ákimdikteriniń jáne aımaqtyq áleýmettik-kásipkerlik korporatsııalarynyń uıymdastyrýymen jáne olardyń súıemeldeýimen iske asyrylyp jatqandyǵyn atap ótken jón, - dedi vıtse-premer jaýabynda.
Onyń atap ótýinshe, taýar nesıesi tásilin iske asyrýǵa bıýdjet qarajaty bólinbeı, joǵaryda atalǵan jol kartasyn iske asyrý aıasynda bıznestiń áleýmettik jaýapkershiligi boıynsha júrgiziledi.
- Osylaısha, taýar nesıesi tásili arqyly kóptegen aýyl turǵyny úshin jańa jumys oryndaryn qura otyryp, aýylda óz kásibin ashýǵa, aýyl sharýashylyǵy ónimderin óndirý kólemin ulǵaıtýǵa, mal basy sanyn ósirýge múmkindik berilip otyr, - dedi ol.
Aıta keteıik, Memleket basshysy Qasym-Jomart Toqaev «Ádiletti Qazaqstan: zań men tártip, ekonomıkalyq ósim, qoǵamdyq optımızm» atty Joldaýynda «Aýyl amanaty» jobasy aıasynda taǵy bir jańa tásildi, ıaǵnı «taýar nesıesin» berý máselesin qarastyrý qajettigin aıtqan edi.