Óńir turǵyndary kóbinese qandaı problemalarǵa shaǵymdanyp júr
ASTANA. KAZINFORM – Óńirlerdegi turǵyndar kóterip júrgen suraqtar negizinen aýyl sharýashylyǵy salasy, óńirlerdi damytý, turǵyn úı máselesine qatysty. Bul týraly Májilistiń jalpy otyrysynda Premer-Mınıstrdiń orynbasary Tamara Dúısenova málim etti.
«Byltyr qazan aıynda depýtattardyń óńirlerge jumys saparlary aıasynda turǵyndar kótergen máselelerdi egjeı-tegjeıli qaraǵan bolatynbyz. Jalpy alǵanda 1700-den astam suraqty júıelep, olar boıynsha naqty qandaı sharalar qabyldanǵany týraly esep berildi. Bul format óziniń tıimdiligin kórsetti. Búgin dástúrli túrde sizderge qańtar aıynda kelip túsken taǵy 1000-ǵa jýyq suraq boıynsha baıandama jasaımyz», - dedi T. Dúısenova.
Osy oraıda ol bul máselelerdiń oryndalý barysy Úkimettiń erekshe baqylaýynda turǵanyn aıtty.
«Júıeli máselelerdiń basym bóligi óz sheshimin tapty. Jekelegen suraqtarǵa meniń áriptesterim sizderge jaýap berýge daıyn. Suraqtardyń mazmunyna keletin bolsaq, olardyń negizgi bóligi aýyl sharýashylyǵy salasy, óńirlerdi damytý, turǵyn úı máseleleri men qaýipsizdik baǵyttaryn qamtyǵan. Budan bólek, 30 paıyzy ınfraqurylymdy damytý, onyń ishinde qurylys, jol, gaz ben sý, áleýmettik nysandardy salý, olardy jóndeýge qatysty bolsa, al qalǵany áleýmettik problemalarǵa arnalǵan», - dedi vıtse-premer.
