Onlaın saýdada tutynýshy quqyǵy qalaı qorǵalady
ASTANA. KAZINFORM – Qazaqstanda onlaın saýda kólemi jyldan jylǵa artyp keledi. Búginde ár ekinshi satyp alý ınternet arqyly jasalady. Yńǵaıly ári qoljetimdi bolǵanymen, onlaın saýda kezinde sapasyz taýar, jalǵan aqparat nemese keshiktirilgen jetkizý sııaqty máseleler jıi týyndaıdy. Mundaı jaǵdaıda tutynýshy óz quqyǵyn qalaı qorǵaı alady?
Tutynýshylardyń quqyqtaryn qorǵaý komıteti mamandarynyń aıtýynsha, vırtýaldy dúkende de tutynýshynyń zańmen bekitilgen naqty quqyqtary bar.
Birinshiden, árbir satyp alýshy taýar týraly tolyq ári shynaıy aqparat alý quqyǵyna ıe. Satýshy saıtta taýardyń quramy, brendi, óndirilgen eli, ólshemi men baǵasyn tolyq kórsetýge mindetti. Eger bul derekter tolyq bolmasa, zań buzýshylyq bolyp sanalady.
Ekinshiden, satyp alýshy sapasyz taýardy qaıtarýǵa nemese aýystyrýǵa quqyly. Mysaly, tapsyrys bergen qulaqqap istemeı qalsa, tutynýshy aqshany qaıtaryp alýǵa nemese taýardy sapalysyna aýystyrýdy talap ete alady.
Úshinshiden, 14 kún ishinde taýardy sebepsiz qaıtarý quqyǵy bar. Eger taýar paıdalanylmaǵan jáne qaptamasy búlinbegen bolsa, satyp alýshy eki apta ishinde ony keri qaıtara alady. Degenmen ish kıim, azyq-túlik, kosmetıka jáne jeke gıgıena zattary bul tizimge kirmeıdi.
Tórtinshiden, satýshy taýardy ýaqtyly jetkizýge jáne óz mindettemesin oryndaýǵa jaýapty. Eger jetkizý merzimi buzylsa, satyp alýshy tapsyrysty boldyrmaýǵa jáne aqshasyn qaıtaryp alýǵa quqyly.
Tutynýshynyń quqyǵy buzylǵan jaǵdaıda, aldymen satýshyǵa resmı shaǵym jazý usynylady. Nátıje bolmasa, azamat Tutynýshylardyń quqyqtaryn qorǵaý komıtetine nemese onyń óńirlik departamentterine júgine alady.
Sondaı-aq E-otinish.gov.kz nemese eGov.kz portaldary arqyly elektrondy ótinish qaldyrýǵa múmkindik bar.
Mamandardyń pikirinshe, habardar azamat — qorǵalǵan azamat. Onlaın nemese oflaın bolsyn, tutynýshynyń quqyqtary birdeı qorǵalady. Eger ár azamat óz quqyǵyn bilse, sapasyz qyzmet pen adal emes satýshylarǵa jol berilmeıdi.
Aıta keteıik, Aqtóbelik tutynýshylar bıyl 77 mln teńge aqshasyn keri qaıtaryp aldy.