Onkologııalyq tekseristen kimder tegin ótedi
ASTANA. KAZINFORM — Qazaqstandyqtar onkologııalyq skrınıngtik zertteýlerden tegin ótedi. Mundaı tekseris patsıenttiń tirkelgen jeri boıynsha medıtsınalyq-sanıtarııalyq alǵashqy kómek uıymdarynda júrgiziledi. Densaýlyq saqtaý mınıstrligi onkoskrınıngten kimder tegin óte alatynyn aıtty.
— Sút bezi obyryn erte anyqtaý úshin: sút beziniń qaterli isikterimen dınamıkalyq baıqaýda turmaǵan 40, 42, 44, 46, 48, 50, 52, 54, 56, 58, 60, 62, 64, 66, 68, 70 jastaǵy áıelder; Jatyr moıny obyryn erte anyqtaý úshin: jatyr moınynyń qaterli isikterimen dınamıkalyq baqylaýda turmaǵan 30, 34, 38, 42, 46, 50, 54, 58, 62, 66, 70 jastaǵy áıelder;
Kolorektaldy obyrdy erte anyqtaý úshin: jýan ishektiń qatersiz jáne qaterli isikterimen dınamıkalyq baıqaýda turmaǵan 50, 52, 54, 56, 58, 60, 62, 64, 66, 68, 70 jastaǵy erler men áıelder óte alady, — deıdi mınıstrlik mamandary.
Mundaı tekserister joǵaryda atalǵan obyr túrlerimen dınamıkalyq baqylaýda turmaıtyn, mindetti áleýmettik medıtsınalyq saqtandyrý júıesinde saqtandyrylǵan azamattarǵa júrgiziledi. Al skrınıngten ótý kerektigi jaıly medıtsınalyq-sanıtarııalyq alǵashqy kómek uıymdary patsıentke qońyraý salý, SMS joldaý arqyly habarlaıdy. Odan bólek mamandar úılerdi aralap, turǵyndardy aqparattandyrady.
— Skrınıng sheńberinde aýrýlardyń dıagnostıkasy dıagnozdy morfologııalyq verıfıkatsııalaý deńgeıine deıin júrgiziledi, odan ári aýrýdyń taralý dárejesin anyqtaý úshin zerttep-qaraý talap etiledi. Obyr aldy protsester anyqtalǵan jaǵdaıda, patsıentter onkologtyń konsýltatsııasynan óte alady. Qazirgi ýaqytta óńirlik onkologııalyq ortalyqtardyń bazasynda, saraptamalyq endoskopııalyq ortalyqtar qurylǵan. Olar kolorektaldy obyr skrınınginen ótetin patsıentter arasynda dıagnostıkalyq endoskopııalyq zertteýlerdi ǵana júzege asyryp qoımaı, saýyqtyrýdan ótedi jáne dınamıkalyq baqylaýǵa alynady, — deıdi Densaýlyq saqtaý mınıstrligi.
Aıta keteıik, skrınıng ázirge MÁMS esebinen qarjylandyrylady. Vedomstva ókilderi onkologııalyq skrınıngti halyqqa tegin kórsetiletin medıtsınalyq qyzmetter tizimine engizýdi josparlanyp otyrǵandaryn habarlady. Zańnamalyq akt qabyldansa, atalǵan tekseris túrleri mindetti áleýmettik medıtsınalyq saqtandyrý júıesinde saqtandyrylmaǵan azamattarǵa da tegin júrgiziledi.
Eske salaıyq, ótken joly 50-den asqan erler ınsýlt pen ınfarktqa qarsy tegin skrınıngten ótetinin jazǵan edik.
Odan bólek Qazaqstanda V jáne S vırýstyq gepatıtterin anyqtaýǵa arnalǵan skrınıng engizilip jatqanyn da habarladyq.