Óńirlik telearna qala balasyn aýylǵa jiberip, realıtı-shoý usynady
«AQTO'BE» arnasynyń jańa maýsymy qyzyqqa toly bolmaq. Bul týraly arnaıy tanystyrylym barysynda aıtyldy. Máselen, jańa maýsymda óz aýylyna kómek kórsetken azamattardyń ıgi isin kórsetýge arnalǵan «Týǵan jerge taǵzym», kıeli jerlerdi kórermenge tanystyrý maqsatynda «Bizdiń tarıh» baǵdarlamasy kórsetiledi.
«Arnaıy top aýyl-aımaqty aralap, túsirilim jasady. Máselen, «Búk-shik» realıtı jobasy qos júrgizýshiniń bás tigip, aýylǵa attanýynan bastalady. Kimniń aýdan ortalyǵyna, qaısysynyń aýylǵa baratyndyǵyn asyq shıyrý arqyly anyqtaıdy. Asyqtyń búk túskeni aýdan ortalyǵyna, shik túskeni aýylǵa ketedi. Aýdanǵa barǵan júrgizýshi sol óńirdiń tynys-tirshiligimen tanystyrady. Kórikti jerlerine saıahat jasap, óndiris oryndaryn aralaıdy. Aýylǵa attanǵan jigit sol aýyldyń qyzý ómirinen habardar etedi. Shalǵaıdaǵy mekenniń kúndelikti tirligine aralasady»,- dedi «AQTO'BE» arnasynyń dırektory Ernur Býrahan.
Sonymen qatar «Eldiń balasy», «Erketaı», «Výpı-paı» baǵdarlamalary men «Ahtanov 54» tok-shoýy kórermenge jol tartty. Jańa maýsymnyń ashylýyna «Qazaqstan» ulttyq arnasy tóraǵasynyń orynbasary Serik Egizbaev qatysyp, sáttilik tiledi. Sonymen qatar Aqtóbe oblysy ákiminiń orynbasary Erbol Nurǵalıev quttyqtady.
«Basqa ýaqytta, basqa zamanda ómir súrip jatyrmyz. Ózgeris, aqparat kóp. Zamanǵa saı jumys isteý basty talaptyń biri. «Qazaqstan» telearnasy ózgerip, halyqqa jańa jobalaryn usyndy. Aqtóbedegi «AQTO'BE» telearnasy da bıyl jańa baǵdarlamalardyń tusaýkeserin jasap otyr. Kórermenniń talǵamy mańyzdy. Oblystyq telearna soǵan saı jumys istep jatyr. Buqaralyq aqparat quraldary halyq pen bılik arasyndaǵy dáneker, kópir. Ár máseleni halyqqa jetkizý, halyqtyń muqtajdyǵyn bizge jetkizý jolynda jergilikti telearna óte jaqsy jumys istep jatyr», - dep atap ótti Erbol Nurǵalıev.
Al kórermenniń negizgi suranysy men tilegin qoǵam qaıratkeri Amangeldi Aıtaly jetkizdi.
«Aqtóbe aqyndarynyń kitabyn jarnamalaǵan durys. Qazaqtyń aqyn-jazýshylarynyń shyǵarmalaryn jarnamalaý biz úshin óte qajet, rýhanı azyq. Elimizdiń mádenı deńgeıin, sanasyn kóteretin úlken baǵdarlamalar iske qosylady dep senemiz. Eń bastysy, qazaqtyń eńsesin kóteretin telearna bolsyn degen tilegimiz bar»,- dedi qoǵam qaıratkeri Amangeldi Aıtaly.
