Óńirlik standarttar júıesine ózgeris engizildi - Álibek Qýantyrov
«Ulttyq ekonomıka mınıstrligi túrli eldi mekender úshin Óńirlik standarttar júıesin (ÓSJ) ázirledi. Júıe halyqqa qajet nysandar men kórsetiletin qyzmetterdiń naqty tizbesin qamtıdy. Atalǵan júıe ár eldi mekenniń mınımaldy turmys standarttaryn aıqyndaıdy. Memlekettik organdar bul júıeni óńirdiń áleýmettik-ekonomıkalyq damýyn josparlaý kezinde paıdalanady. Bul rette Mınıstrlik óńirlerdiń mınımaldy standarttarǵa sáıkestigi turǵysynan jyl saıyn monıtorıng júrgizip, baqylaıdy», - dedi Á. Qýantyrov.
Onyń aıtýynsha, óńirlik standarttar júıesi aýmaqtyq damý salasyndaǵy Memlekettik josparlaý júıesiniń negizgi qujattarymen ıntegratsııalanǵan.
«Máselen, 2025 jylǵa deıingi aýmaqtyq damý josparynda jáne Aýyldyq aýmaqtardy damytýdyń 2023–2027 jyldarǵa arnalǵan tujyrymdamasynda elimizdiń óńirleriniń damýy men aýyldyq aýmaqtaryna qatysty ÓSJ tásilderi eskerilgen. Sonymen qatar, ázirlenip jatqan jańa Bıýdjet kodeksi aıasynda ÓSJ erejelerin jalpy sıpattaǵy transfertterdi (JST), memlekettik organdar men oblystardyń ınvestıtsııalyq josparlaryn qalyptastyrý bóliginde bıýdjettik josparlaýmen baılanystyrý qarastyrylǵan. Bul rette respýblıkalyq bıýdjetti qalyptastyrý kezinde ÓSJ parametrlerin qoldanyp júrgenimizdi atap ótkim keledi», - dedi mınıstr.
Onyń sózine qaraǵanda, 2021 jylǵy jaǵdaı boıynsha óńirler bólinisinde barlyq eldi mekender boıynsha nysandarmen jáne kórsetiletin qyzmettermen qamtamasyz etilý deńgeıi 2019 jylmen salystyrǵanda 9,3 paıyzdyq tarmaqqa ulǵaıyp, 64,1%-dy qurady.
«Sonymen birge, óńirler ákimdikteriniń, múddeli memlekettik organdardyń, qoǵamdyq uıymdardyń usynystaryn, sondaı-aq byltyrǵy parlamenttik tyńdaýlardyń qorytyndylary boıynsha Mınıstrlik 2022 jyly Óńirlik standarttar júıesin jetildirý boıynsha aýqymdy jumys istedi. Osy oraıda bıylǵy qańtarda ÓSJ-ge tıisti ózgeris men tolyqtyrý engizilip, ÓSJ kórsetkishterin esepteýdi baǵalaýdyń jańa Ádistemesiniń jobasy ázirlendi. ÓSJ-niń jańa redaktsııasy aıasynda nysandar men kórsetiletin qyzmetterdiń tizbesi aıtarlyqtaı keńeıtildi, sondaı-aq eldi mekenderdiń qosymsha klassıfıkatsııasy júrgizildi. Budan basqa, ÓSJ kórsetkishterin esepteýdiń jańa ádistemesine nysandar men kórsetiletin qyzmetterdiń sapasyn sıpattaıtyn kórsetkishter qosyldy. ıAǵnı, endi nysannyń tehnıkalyq sıpattamalary jáne materıaldyq-tehnıkalyq bazamen jaraqtandyrylý deńgeıi de eskeriledi», - dedi vedomstvo basshysy.
Atap aıtqanda, buryn qoldanylǵan ÓSJ ádistemesinde jumys istep turǵan nysannyń bar-joǵy ǵana baǵalanyp keldi.
«Máselen, Aqmola oblysynyń Zerendi aýylynda úsh mektep bar, burynǵy ÓSJ boıynsha qamtamasyz etilýi 100% dep eseptelgen edi. Qazirgi kezde Zerendi aýylynda 3 mekteptiń 2-i kúrdeli jóndeýdi qajet etedi, sondaı-aq taǵy 1 mektepti salý kerek. Bul turǵyda sapa boıynsha kórsetkishterdi eskere otyryp, jańa ÓSJ ádistemesi boıynsha Zerendi aýylynyń qamtamasyz etilý deńgeıi 81%-ǵa deıin tómendedi. Jańa ÓSJ áleýmettik, ınjenerlik-kóliktik, ekologııalyq jáne turmystyq salalarynda 12 baǵyt boıynsha qurylymdaldy. Eldi mekender respýblıkalyq jáne oblystyq, sonymen qatar aýdandyq mańyzy bar qalalar jáne aýdan ortalyqtary, aýyldyq okrýgterdiń ortalyqtary, tirek aýyldyq eldi mekender jáne basqa da aýyldyq eldi mekender sııaqty 5 sanat boıynsha toptastyrylǵan», - dedi Á. Qýantyrov.
