Óńirlerdi damytýdyń 2025 jylǵa deıingi jańa baǵdarlamasy ázirlenedi

ASTANA. QazAqparat - Óńirlerdi damytýdyń 2025 jylǵa deıingi jańa baǵdarlamasy ázirlenedi. Bul týraly Elbasy Joldaýynan týyndaıtyn tapsyrmalardy oryndaý máseleleri qaralǵan QR Úkimetiniń keńeıtilgen otyrysynda QR Ulttyq ekonomıka mınıstri Tımýr Súleımenov aıtty, dep habarlaıdy QazAqparat tilshisi.

T.Súleımenov atap ótkendeı, qazirgi ýaqytta Mınıstrlik Ekonomıkalyq zertteýler ınstıtýtymen, sondaı-aq belgili ǵalymdar tobymen birlesip, álemdik tájirıbeni zerdeleı otyryp, elimizdiń aýmaqtyq-keńistiktik uıymdastyrylýyn jetildirý jóninde taldamalyq zertteý júrgizip jatyr.

Atalǵan zertteý elimizdiń 2030 jylǵa deıingi aýmaqtyq-keńistiktik damýynyń jańa boljamdy shemasyn ázirleýge negiz bolmaq. Ol 2019 jylǵy 1 qyrkúıekke deıin Prezıdent Ákimshiliginiń qaraýyna jiberiletin bolady. Boljamdy shemany sapaly iske asyrý úshin 2019 jylǵy 1 qarashaǵa deıin Óńirlerdi damytýdyń 2025 jylǵa deıingi jańa baǵdarlamasy ázirlenetin bolady.

Memleket basshysynyń tapsyrmalaryn eskere otyryp, jergilikti ınfraqurylymdy damytý basymdyq bolmaq: energııamen jabdyqtaý, sýmen jabdyqtaý jáne sý tartý, jergilikti joldar. 2018 jyly respýblıkalyq bıýdjetten osy maqsattarǵa 332 mlrd teńge bólindi. Óńirlerdi damytý baǵdarlamasyn júzege asyrý nátıjesinde qalalarda ortalyqtandyrylǵan sýmen jabdyqtaý - 100% aýyldardaǵy ortalyqtandyrylǵan sýmen jabdyqtaý - 80 paıyzdy quraıtyn bolady.

Aýmaqtyq damýdyń jańa tásilderi qalalar men shalǵaı aýdandardaǵy ómir súrý sapasyn arttyrady, sondaı-aq óńirlik ekonomıkanyń damýyn yntalandyrady.