Óńirlerde «Jańa mamandyqtar atlasy» jasalady

NUR-SULTAN. QazAqparat – Óńirlerde «Jańa mamandyqtar men biliktilikter atlasy jasalady. Eńbek jáne halyqty áleýmettik qorǵaý mınıstrliginiń keńeıtilgen alqa májilisinde QR Premer-Mınıstriniń orynbasary Eraly Toǵjanov osyndaı tapsyrma berdi, dep habarlaıdy QazAqparat tilshisi.

«Búginde ekonomıkadaǵy jumys oryndarynyń aıtarlyqtaı bóligi joǵary biliktilikti qajet etpeıdi. Bul ondaǵy jumysshylardyń aılyǵy men ónimdiliginiń tómen bolýyna yqpal etip otyr. Osyǵan baılanysty jumys kúshteriniń biliktiligin arttyrý qajettiligi týyndaıdy. Osy baǵytta ónimdiligi joǵary jumys oryndaryn qurýdyń mańyzy zor», - dedi Úkimet basshysynyń orynbasary.

Bul iste ol ózge óńirlerge Pavlodar oblysynyń tájirıbesin basshylyqqa alý kerektigin atady.

«Jańa mamandyqtar men biliktilikter atlasy» jobasyn basshylyqqa alýdy usynamyn. Bul azamattarǵa keleshegi bar mamandyqtarǵa beıimdelýge múmkindik beredi. Pavlodar oblysynda osy jobanyń qanshalyqty tıimdi bolǵanyna taldaý jasap kórdim. Arnaıy sol jaqqa baryp keldim. Barlyq oblys ákimderiniń orynbasarlaryna osy jobany negizge alý kerektigi týraly tapsyrma bergenmin. Endi sony júzege asyrýdyń joldaryn qarastyrý kerek. Biraq oǵan janyńdy, salyp, júregińdi salyp, qandaı paıdaly ekenin túsine otyryp kirisý kerek», - dedi vıtse-premer.