Óńirdiń ereksheligine baılanysty sýbsıdııanyń ózge de túrleri beriledi – Premer
2008 jyly qurylǵan kásiporyn ósimdik sharýashylyǵymen (egis alańy 4 682 ga) sondaı-aq sút jáne et shyǵarýǵa baǵdarlanǵan mal sharýashylyǵymen (shamamen 5 myń bas ІQM) aınalysady. Ótken jyly kompanııa memlekettik qoldaý aıasynda 376,7 mln teńge aldy.
Premer-Mınıstr Soltústik Qazaqstan ártaraptandyrýda kósh bastap turǵan, elimizdiń basty astyqty óńirleriniń biri ekenin atap ótti. Munda maıly daqyldardyń egis alqaby shamamen 1 mln gektarǵa jetti, bul – elimizdegi eń joǵary kórsetkish.
«Óńirdiń básekege qabiletti ónimniń iri óndirýshisi men jetkizýshisi bolýǵa barlyq múmkindikteri men áleýeti bar. Mańyzdy mindet – eńbek ónimdiliginiń turaqty ósýin qamtamasyz etý jáne jańa tehnologııalardy engizý. Osy sharalardyń barlyǵy halyq tabysynyń naqty ósýine jol ashýy tıis», — dep atap ótti Úkimet basshysy.
Sondaı-aq Álıhan Smaıylov SQO-da iske qosylǵan 22 zamanaýı fermanyń biri sanalatyn kásiporynnyń jańa sút fermasyna bardy. 5 jyl ishinde oblystaǵy uıymdastyrylǵan sharýashylyqtarda sút óndirisiniń ósimi 30%-dy qurady, sútti qaıta óńdeý úlesi 40%-dan 55%-ǵa deıin artty. Jyl sońyna deıin taǵy segiz sút keshenin ashý josparlanyp otyr.
«Jyl saıyn elimizde keminde 35 sút-taýar fermasyn, onyń ishinde ónerkásip úlgisindegi 10-15 ferma salý josparda bar. Mundaı jobalardy iske asyrý óndiris kólemin ulǵaıtýǵa, sút óńdeý kásiporyndarynyń júktemesin arttyrýǵa, ımportqa táýeldilikti azaıtýǵa, jańa jumys oryndaryn qurýǵa múmkindik beredi. Osy baǵyttaǵy jumysty jalǵastyrý qajet», — dedi Premer-Mınıstr.
Sonymen qatar Álıhan Smaıylov kásiporynda jergilikti sharýa qojalyqtarynyń basshylarymen kezdesý ótkizdi, onda salyq salý, sýbsıdııalaý, kadrlardy daıarlaý, tyńaıtqyshtar jetkizý jáne ishki naryqqa shyǵarylatyn aýyl sharýashylyǵy ónimderin satyp alý baǵalary jónindegi máseleler kóterildi.
«Sýbsıdııalaýǵa keletin bolsaq, mundaǵy basty mindet – ónimdilikti arttyrý, ıaǵnı respýblıkalyq bıýdjetten bólingen árbir teńge ónimdilikti yntalandyrýǵa baǵyttalýy tıis. Osy oraıda biz jergilikti atqarýshy organdarǵa óńirdiń ereksheligine jáne jaǵdaıǵa baılanysty sýbsıdııalardyń ózge de túrlerin berýge quqyq beremiz. Qalaı bolǵanda da, sýbsıdııalaýdyń jańa tásilderi aýyl sharýashylyǵy taýaryn óndirýshiler – sizdermen birge qabyldanady», — dedi Á. Smaıylov. Premer-Mınıstr sharýalardyń suraqtaryna jaýap berip, tıisti memlekettik organdarǵa olardy sheshý joldaryn baqylaýda ustaýdy tapsyrdy.
Úkimet basshysy óńirge sapary barysynda ónerkásip jáne aýyl sharýashylyǵy kásiporyndaryn aralap, áleýmettik jáne óndiristik nysandar qurylysymen tanysady, sondaı-aq oblysty keshendi damytý máseleleri jóninde keńes ótkizedi.
