Ónimdi az beretin egistikti jaıylymǵa aınaldyrýdyń tıimdiligi joǵary - A. Prışepov

ALMATY. QazAqparat - Qazaqstanda ónimdi az beretin egistik jerlerdi jaıylymdyq jerlerge aınaldyrýdyń tıimdiligi óte joǵary. Bul týraly búgin Almatyda «Jibek joly boıyndaǵy aýyl sharýashylyǵy salasyn jandandyrý: Ortalyq Azııa óńirindegi qurylymdyq ózgerister, resýrstar jáne saýda» taqyrybynda ótip jatqan halyqaralyq ǵylymı konferentsııa-sımpozıým barysynda Kopengagen ýnıversıtetiniń professory, Germanııadaǵy Ótpeli ekonomıkaly elderdegi agrarlyq damý Leıbnıts ınstıtýtynyń aǵa ǵylymı qyzmetkeri Aleksandr Prışepov málim etti.

Onyń aıtýynsha, gaktaryna 2-3 tsentner ónim beretin jerlerdi qaıta-qaıta jyrtyp, egin egý - kóp shyǵyn keltiredi ári jerge zııanyn tıgizedi.

«Qazaqstan o basta mal sharýashylyǵy keńinen damyǵan el bolyp keldi. Qazir de osy salany damytýǵa Qazaqstannyń áleýeti jetedi. Bul úshin ár túrli ekonomıkalyq sebeptermen qaraýsyz qalǵan, onsyz da ónimdiligi az egistik jerlerdi jaıylymdyq jerlerge aınaldyrýǵa bolady. Búginde Reseı, Qazaqstan jáne Ýkraınada 60-70 mln gektar egistik jer qaraýsyz jatyr. Solardyń ishinde 50 mln astam gektar jer Reseıge tıesili bolsa, 10 mln gektardaı jer Qazaqstandiki. Árıne, olardy birtindep, aýyl sharýashylyǵy aınalymyna qaıta engizý sharalary júrgizilip jatyr. Biraq, sol 10 mln gektar jerdiń tek 1-2 mln gektaryn ǵana qaıtadan egistikke paıdalanýǵa bolady. Qalǵandary tıimsiz. Olardy jaıylymǵa aınaldyrsa quba-qup bolar edi. Bul úshin árıne arnaıy memlekettik baǵdarlama qajet», - dedi A. Prışepov.     

Sonymen qatar, ol búgingi tańda aýyl sharýashylyǵyn damytýǵa jerseriktik monıtorıng júıesin engizýdiń mańyzdy ról atqaratyndyǵyn jetkizdi.  

«Budan bary-joǵy 10 jyl buryn bul júıeni aýyl sharýashylyǵyna paıdalaný týraly aıtýdyń ózi orynsyzdaý edi. Ǵaryshtyq ǵylymı sýretterdiń ózi qymbat bolatyn. Al qazir olardy tegin alýǵa bolady. Endi bolashaqta aýyl sharýashylyǵyn damytý, egistik jerlerdiń ónimdiligin arttyrý spýtnıktik monıtorıng júıesimen tyǵyz baılanysty bolady», - dedi A. Prışepov.