OneWeb pen «Astana» HQO seriktestik jónindegi kelisimge qol qoıdy
Bul týraly «Astana» Halyqaralyq qarjy ortalyǵynyń baspasóz qyzmeti habarlady.
Memorandým Qazaqstan men Orta Azııada birqatar mańyzdy maqsatqa qol jetkizý jolyndaǵy seriktestiktiń bastaý alǵanyn bildiredi. Máselen, Qazaqstanda birinshi keń jolaqty joǵarǵy jyldamdyqtaǵy spýtnıktik baılanysyn usynýdan bastap, búkil Orta Azııa boıynsha OneWeb baılanys qyzmetterin kórsetýdi qoldaý úshin elde tehnıkalyq torap qurý bolmaq.
Memorandýmǵa AHQO Basqarýshysy Qaırat Kelimbetov pen OneWeb Bas dırektory Adrıan Shtekel Davostaǵy Dúnıejúzilik ekonomıkalyq forýmy kezinde qol qoıdy. Olar OneWeb pen Qazaqstan arasyndaǵy yntymaqtastyqty keńeıtý úshin «Tsıfrlyq Qazaqstan» baǵdarlamasyn iske asyrýǵa járdemdesý jóninde OneWeb-tiń rólin jáne basqa da bastamalardy talqylady.
«Tsıfrlyq Qazaqstan» baǵdarlamasynyń baǵyttarynyń biri 2022 jylǵa qaraı Qazaqstan Respýblıkasy boıynsha keń jolaqty joǵarǵy jyldamdyqtaǵy ınternetti búkil halyqqa qoljetimdi etý. Osylaısha tsıfrlyq tehnologııalardyń kómegimen turǵyndardyń ómir súrý deńgeıin jaqsarta otyryp, el ekonomıkasyn damytýǵa yqpal etedi. «Tsıfrlyq Qazaqstan» baǵdarlamasy, sondaı-aq eldiń telekommýnıkatsııalyq jelilerin keńeıtýge múmkindik beredi ári shalǵaı jatqan 6600 eldi mekendi jerserik arqyly ınternetke qosady.
Osy rette OneWeb Qazaqstannyń mektepteri men aýrýhanalary, basqa da kásiporyndarynda, jeke jáne memlekettik sektorlarda «talshyq tárizdi» keń jolaqty joǵarǵy jyldamdyqtaǵy baılanyspen qamtamasyz etý úshin jergilikti baılanys operatorlaryn dıstrıbýtsııa boıynsha seriktes retinde shaqyratyn bolady.
Sondaı-aq, Qazaqstannyń qoldanystaǵy ǵarysh ınfraqurylymy sheńberinde búkil Orta Azııa aımaǵyna qyzmet kórsetetin Tehnıkalyq ortalyq ashý jaıyn qarastyrmaq. OneWeb Orta Azııadaǵy Tehnıkalyq ortalyqtyń jumysy úshin AHQO quzyretinde birlesken kásiporyn qurý múmkindigin qarastyrady.
OneWeb Qazaqstannyń óz ekonomıkasyn tsıfrlandyrýǵa jáne jańa spýtnıktiń baılanys tehnologııalarynyń kóshbasshy ortalyǵyna aınalýyn ári «Jańa keńistik» spýtnıktik tehnologııasyn damytýǵa biregeı tájirıbe men jalpy spýtnıktik baılanys sektoryna serpin bere otyryp, Qazaqstannyń ınnovatsııalyq memleket retinde damýyn qoldaıdy.
