«Ónerli ólke»: Kentaýlyqtar Túrkistanda bir tonna baýyrsaq taratty
TÚRKІSTAN. KAZINFORM — Tarıhy baı, taǵlymy tereń Túrkistan tórinde «Ónerli ólke» oblystyq óner festıvali aıasynda Kentaý qalasynyń mádenıet kúnderi bastaldy. Bul týraly Túrkistan oblysy ákimdiginiń baspasóz qyzmeti málim etti.
«Búgin Etnoaýylda umyt bolyp bara jatqan ulttyq taǵamdar nasıhattalyp, «Qarataý táji» ulttyq aspaptar ansambliniń kontserttik baǵdarlamasy usynyldy. Ulttyq qundylyǵymyzdy dáripteıtin qolóner sheberleriniń ulttyq naqyshtaǵy kórmesi jáne sheberlik saǵattary kópshiliktiń kózaıymyna aınalsa, «Qarataý jaýharlary» ólke tarıhynan syr shertetin kórme jáne fotoaımaq kelgen qonaqtarǵa tanystyryldy», — delingen habarlamada.
Odan bólek, jastar saýyq-saıran quryp «Altybaqan» oıynyn kórsetse, jas aqyndar aıtys ónerinen synǵa tústi. Kentaý qalasynyń halyqtyq ataǵy bar «Shapalaq» teatry «Ańyz astary» atty kórinister kórsetip eldiń ystyq-yqylasyna bólendi.
Kentaý qalasynan shyqqan qala maqtanyshtarynyń «Ańyz adam» kórmesi men «Dástúrler danalyǵy» urpaq tárbıesine tereń mán beriletin salt-dástúrlerimizdiń erekshe túrlerinen qoıylymdar kórermenge jol tartty.
Túrkistan tórinde osylaısha ashyq aspan astynda mádenı sharany barynsha jan-jaqty kórermenge usynǵan kentaýlyqtar «BaýyrsaqFest» uıymdastyryp kelgen qonaqtarǵa bir tonna baýyrsaq taratty.
Aıte keteıik, Kentaý qalasynyń mádenı kúnderi 12 qyrkúıekte saǵat 10:00–den aýylsharýashylyq jármeńkesi, ulttyq oıyndar, batpyraýyq ushyrýdan saıys bastalady. Keshke tanymal jaryq juldyzdary AqbotaNur Seıtmahanbetova, Kayl Rýh laqap atymen tanymal juldyzdarynyń qatysýymen gala-kontsert ótedi.
Keshtiń kórkin ashatyn júrgizýshiler Túrkistan teatrynyń myqty maıtalmandary Aqsultan Ánýarbek, Gúlzada Aıtbaeva.Túrkistan oblysy ákiminiń baspasóz qyzmeti
