Ónerkásip pen qurylys salasynda qandaı jańa mamandyqtar paıda boldy
ASTANA. KAZINFORM — Qoǵamda qol eńbeginiń avtomattandyrylǵan eńbek túrimen birtindep aýysýy jumysshy mamandyqtar týraly túsinikti túbegeıli ózgertýge múmkindik beredi. Bul týraly Ónerkásip jáne qurylys vıtse-mınıstri Iran Sharhan Úkimet otyrysynda aıtyp berdi.
Onyń aıtýynsha, mınıstrlik jetekshilik etetin salalar boıynsha kadrlarǵa qajettilik 40 myńǵa jýyq adam bolyp otyr.
— Búgingi kúni jańa mamandyqtar atlasynda mınıstrlik salalary boıynsha 75 jańa mamandyq bar. Mysaly metallýrgııa jáne taý-ken óndirisi salasynda smart júıelerdi ázirleýshi, robottandyrylǵan taý tehnıkasynyń operatory, mashına jasaý salasynda — vırtýaldy retteýshi maman, qurylysta Big data taldaýshysy, Aqyldy úı jobalaýshysy sııaqty jańa mamandyqtar paıda boldy, — dedi Iran Sharhan.
Sonymen birge, bıznes-protsesterdi avtomattandyrýǵa baılanysty 40-tan astam mamandyq ózgeriske ushyraǵan. Bıyl 190 ınvestıtsııalyq jobany iske qosý barysynda mashına jasaýda taǵy 8 jańa mamandyq paıda bolady.
— Olardyń qatarynda 3D basyp shyǵarý jáne dánekerleý ınjeneri, robottandyrylǵan júıelerdiń operatory bar. Osylaısha qol eńbeginiń avtomattandyrylǵan eńbek túrimen birtindep aýysýy baıqalýda. Bul qoǵamdaǵy jumysshy mamandyqtar týraly túsinikti túbegeıli ózgertýge múmkindik beredi, — dedi vıtse-mınıstr.
Aıta keteıik, Premer-mınıstr Oljas Bektenov eńbek adamynyń abyroı-bedelin arttyrýǵa erekshe kóńil bólý kerektigin aıtqan edi.