Ónerkásip mınıstrligi el turǵyndaryn kómirdi erterek satyp alýǵa shaqyrdy

ASTANA. KAZINFORM – Kúnniń sýytqanyn kútpeı kómirdi erterek satyp alý qajet. Bul týraly Ónerkásip jáne qurylym mınıstrligi Ónerkásip komıteti tóraǵasynyń orynbasary Turar Jolmaǵambetov aıtty.

Onyń aıtýynsha, halyqty jáne kommýnaldyq-turmystyq sektordyń kómirge degen qajettiligi 8,6 mln tonnany quraıdy. Búginde onyń 1 mln tonnasy jetkizilgen.

«Tapshylyq oryn alýy múmkin be? Jalpy, kómir bar. Biz álemde kómirdi óndirý men barlaý boıynsha úzdik 10 eldiń qataryna kiremiz. Jyljymaıtyn quram tolyǵymen daıyn, parktiń de ulǵaıtylǵany aıtyldy. Jergilikti jerlerde de ákimdikter daıyn otyr. Endigi másele suranysqa baılanysty. Eger, halyq kúnniń sýytqanyn kútetin bolsa, onda problama bolady. sol kezde (tapshylyq) kútýimiz yqtımal», - dedi Turar Jolmaǵanbetov Ortalyq kommýnıkatsııalar qyzmetindegi baspasóz máslıhatynda. 

Onyń dereginshe, temir jol tuıyqtary kúnine ary ketkende 100 mashınaǵa ǵana kómir tıeı alady.

«Al bári kún sýytqanyn kútse, onda 500 mashınaǵa deıin suranys bolady. Mundaı kólemge operatordyń qyzmeti kórsete almaıtyndyǵy túsinikti. Sondyqtan kúnniń sýytqanyn kútpeı kómirdi erterek satyp alýy úshin halyqtyń arasynda aqparattyq naýqan júrgizý qajettigin aıtyp otyrmyz. Jalpy, kómir de, jyljymaly quram da jetkilikti. Bizdiń endigi mindetimiz – kómir satyp alý. Qazir tamyz, qyrkúıek aılarynda tek temir jol tuıyqtaryndaǵy ǵana emes, halyqtyń qolyndaǵy da qordy arttyrýymyz qajet», - dedi komıtet tóraǵasynyń orynbasary.