Ónerkásiptik saıasat jónindegi vedomstvoaralyq komıssııa qurylady
Atalmysh zańdy daıyndaýdy Memleket basshysy Qasym-Jomart Toqaev tapsyrǵan bolatyn. Indýstrııa jáne ınfraqurylymdyq damý mınıstrligine qarasty ónerkásip saıasaty departamentiniń dırektory Laýra Sadykovanyń aıtýynsha, qazir qujat jobasy Májilistiń qaraýynda jatyr.
«Zań jobasynda ekonomıkalyq, ákimshilik, quqyqtyq, ınstıtýtsıonaldyq jáne basqa jaǵdaılardy qamtıtyn ónerkásiptik klımat uǵymyn engizý kózdelip otyr. Ózderińizge belgili búgingi tańda óndiriske qatysty fýnktsııalar ártúrli vedomstvalar arasynda bólingen. Zań jobasynda Ónerkásiptik saıasat jónindegi vedomstvoaralyq komıssııa qurý kózdeledi. Onyń músheleri memlekettik organdar basshylarynyń orynbasarlary, ónerkásiptik kásiporyndardyń ókilderi, qoǵam qaıratkerleri, depýtattar jáne basqa da múddeli tulǵalar bolady dep kózdelýde», - deıdi mınıstrlik ókili.
Onyń málimetinshe, vedomstvoaralyq komıssııa Úkimet atynan halyqaralyq kelissózderge daıyndyq júgizetin quzyretke ıe bolmaq.
«Vedomstvoaralyq komıssııa kelesi quzyretterge ıe bolady dep otyrmyz. Jańa yntalandyrý sharalaryn engizý, qoldanystaǵy yntalandyrý sharalaryn qaıta qaraý nemese joıý týraly Úkimetke usynystar qalyptastyra alady. Indýstrııalyq saıasat boıynsha halyqaralyq uıymdarmen kelissózderge Úkimettiń pozıtsııasyn daıyndaýǵa quzyretti bolady. Ónerkásiptik saıasat máseleleri boıynsha memlekettik organdar arasyndaǵy kelispeýshilikter týraly sheshim qabyldap, atalmysh saıasattyń iske asyrylýy týraly esepterdi tyńdaıtyn bolady», - dedi Laýra Sadykova.
