Óndirýshiler Qazaqstandyq taýar óndirýshiler reestrinde tirkelýi tıis

ASTANA. KAZINFORM – «Qazaqstandyq taýar óndirýshiler reestri» memlekettik tsıfrlyq platformasy iske qosyldy. Qazirgi ýaqytta júıe tájirıbelik paıdalanýǵa berilip, e-ondiris.gov.kz saıtynda qoljetimdi.

Jańa tsıfrlyq júıege birtindep jáne kedergisiz kóshý úshin buryn jaramdy ındýstrııalyq sertıfıkattar negizinde qazaqstandyq óndirýshi mártebesin rastaǵan 1 868 sýbekt avtomatty túrde reestrge engizildi.

Qoldanystaǵy qaǵıdalarǵa sáıkes, barlyq bıznes sýbektileri Qazaqstandyq taýar óndirýshiler reestrin júrgizý tártibi aıasynda aqparattyq júıede tirkelý úshin ótinish bere alady.

Qazirgi ýaqytta:
– júıede 2 769-dan astam kompanııa tirkelgen;
– 1 346 ótinim qabyldanǵan.

- Reestrge mashına jasaý, qurylys ındýstrııasy jáne jeńil ónerkásip salalaryndaǵy kásiporyndar engizilgen. Olardyń qatarynda temirjol tehnıkasyn, avtomobıl komponentterin, sorǵy jabdyqtaryn, tsement pen beton buıymdaryn, keramıkalyq plıtkalar men aıaq kıim óndiretin kásiporyndar bar, - delingen Ónerkásip jáne qurylys mınıstrligi aqparatynda.

Buǵan deıin Reestrge avtomatty túrde engizilgen óndirýshiler 30 qańtarǵa deıin júıedegi derekterin tolyqtyryp, ótinimderin elektrondyq tsıfrlyq qoltańba arqyly rastaýy tıis. Atalǵan talap oryndalmaǵan jaǵdaıda kásiporyndar Qazaqstandyq taýar óndirýshiler reestrinen shyǵarylatyn bolady.

Tsıfrlyq platformany engizý rásimderdiń ashyqtyǵyn arttyrýǵa, ákimshilik kedergilerdi azaıtýǵa jáne memlekettik qoldaý sharalaryn naqty óndiristik qyzmetpen aınalysatyn kásiporyndarǵa baǵyttaýǵa múmkindik beredi.

Qazaqstandyq taýar óndirýshiler reestrin kezeń-kezeńimen tolyqtyrý jumystary jalǵasýda.

Aıta keteıik, otandyq óndirýshilerge taýarlardy temirjol arqyly tasymaldaý shyǵyndary óteledi.