Óndiristik qaýipsizdikke jaýapty basshylardyń quzyreti keńeıtildi

NUR-SULTAN. QazAqparat – Óndiristik qaýipsizdikke jaýapty basshylar mekemede qaýipsizdik tártibin saqtamaǵan adamdardy jumystan shettetip, qajet bolsa, tutas óndiristi toqtatýǵa quqyly. Bul týraly QR Tótenshe jaǵdaılar mınıstrligi Ónerkásiptik qaýipsizdik komıtetiniń tóraǵasy Nyǵmetjan Maqajanov aıtty, dep habarlaıdy QazAqparat tilshisi.

Ortalyq kommýnıkatsııalar qyzmetinde ótken brıfıngide Nyǵmetjan Maqajanov óndiristik qaýipsizdik salasyndaǵy zańnamalyq ózgerister týraly málimet berdi.

«Bıyl sáýirde Memleket basshysy aǵymdaǵy «Ónerkásiptik qaýipsizdik máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń Zańyna qol qoıǵanyn atap ótken jón. Jalpy qabyldanǵan jańashyldyqtar zańnama normalaryn jetildirýge, qaýipti obektilerdegi memlekettik qadaǵalaýdyń tıimdiligin arttyrýǵa, ónerkásiptik qaýipsizdik salasynda jumystar júrgizý quqyǵyna attestattalǵan jáne avarııalyq-qutqarý jumystaryn júrgize alatyn uıymdardyń qyzmetin retteýge baǵyttalǵan», - dedi komıtet basshysy

Onyń aıtýynsha, zańnamalyq ózgeristerdiń nátıjesinde óndiristik baqylaý qyzmetteriniń laýazymdy tulǵalarynyń mártebesi kúsheıtilgen

«Atap aıtqanda, jumyskerlerdiń ómiri men densaýlyǵyna qater tónetin jaǵdaı baıqalsa, óndiristik baqylaý qyzmetteriniń laýazymdy tulǵalary jumysty ýaqytsha toqtatyp, tekserý uıymdastyrýǵa jáne qaýipsizdik talaptaryna sáıkes kelmeıtin adamdardy jumystan shettetýge quqyly. Bul jańalyqtar kásiporynǵa óz qyzmetinde ónerkásiptik qaýipsizdik talaptarynyń buzylýyn óz betinshe anyqtaýǵa múmkindik beredi. Bir jaǵynan jumys berýshi yqtımal olqylyqtyń aldyn alýǵa múddeli bolady. Óıtkeni kásiporynnyń jumysynda órekel olqylyq tabylmasa, bir jylǵa tekserýden bosatylýy múmkin. Osylaısha kásiporyn basshylary men quryltaıshylaryn yntalandyrý sharasy engizilip otyr», - dedi Nyǵmetjan Maqajanov.