Óńdeý ónerkásibi jobalaryn qarjylandyratyn baǵdarlama iske qosyldy

ASTANA. QazAqparat – Búginnen bastap óńdeý ónerkásibimen aınalysatyn shaǵyn jáne orta bıznes sýbektileriniń jobalaryna qarjyny lızıngke berý baǵdarlamasy iske qosyldy. Bul týraly «Ónerkásipti damytý qory» AQ baspasóz qyzmetinen málim etti, dep habarlaıdy QazAqparat tilshisi.

«Baǵdarlama Indýstrııalyq-ınnovatsııalyq damýdyń 2020-2025 jyldarǵa arnalǵan tujyrymdamasy sheńberinde ShOB sýbektilerin qoljetimdi qarjylandyrýǵa baǵyttalǵan. Baǵdarlama boıynsha qarastyrylǵan jalpy qarajat kólemi – 50 mlrd teńge. Óńdeýshi ónerkásip salasyndaǵy otandyq kásiporyndarǵa lızıng jáne nesıe berý quraldary arqyly qarjylandyrý usynylady. Bul rette kredıt somasy lızıng somasynan aspaýǵa tıis.

Jobalardy qaraý kezinde negizgi basymdyq eldiń eksporttyq áleýetin ósirýge múmkindik beretin kásiporyndarǵa beriledi», - delingen qordyń baspasóz qyzmeti taratqan habarlamada.

Baǵdarlamanyń negizgi talaptary:

- Qarjylandyrý merzimi - 10 jylǵa deıin;

- Syıaqy mólsherlemesi - jylyna 3 paıyz;

- Qarjylandyrý somasy - 80 mln teńgeden bastap 3 mlrd teńgege deıin;

- Baǵdarlamaǵa qatysatyn kásipker joba qunynyń keminde 15 paıyzyn óz qarajaty esebinen júrgizedi.