Ońdasyn Orazalın muǵalimderge bilim men tárbıeni qatar alyp júrýdi tapsyrdy
Bıyl Aqtóbede 424 mektep jumys isteıdi. Onda 173 myńnan astam bala oqıdy.
«Bilimdi ult: tereń bilim, eńbekqorlyq jáne otanshyldyq qasıet» atty tamyz keńesinde sol balalarǵa bilim berý, olardyń tárbıesi jaıly sóz qozǵaldy.
«Birinshiden, bilim berý uıymdarynda tárbıe jumystaryn jandandyryp, jańa jumys formattaryn qarastyrýdy jedel qolǵa alyp, zaman aǵymyna saı ozyq úlgilerge negizdelgen oqý-tárbıe jumystaryna basymdyq berý qajet. Tárbıege negizdelmegen bilim oqý sapasyn jaqsartpaıdy. Qazir jastar arasynda sýıtsıd, qylmys, quqyqbuzýshylyq, zorlyq-zombylyq, bir-birin bopsalaý, qorqytý, qorlyq kórsetý kóbeıip ketti. Oqýshylardy tárbıeleý, bilim berý uıymdary men muǵalimniń basty jumysy. Muny áste esten shyǵarmaýymyz kerek. Oǵan júıeli túrde júrgiziletin naqty jumystardyń arqasynda ǵana qol jetkizýge bolady. Bul jumystyń ózegi bizdiń salt-dástúrimiz, rýhanı qundylyqtarymyz bolýy tıis. Balabaqshada, mektepte berilgen bilim, tárbıe elimizdiń bolashaǵyna tikeleı áser etedi. Biz bárimiz buǵan múddelimiz. Bilim mekemesinde bala tártibi qatań baqylaýda bolýy qajet. Bul baǵytta sizderge úlken jaýapkershilik artamyn»,- dedi oblys ákimi Ońdasyn Orazalın.
Bıyl 4,4 mlrd teńgege 3650 oryndyq 13 mektep qurylysy júrgizilip jatyr. Bul úsh aýysymdy 2, apatty 3, oryn tapshylyǵy bar 4 jáne eski 5 mekteptiń máselesin sheshedi.
Balalar tasymaly da as mańyzdy máselelerdiń biri. Úsh jyldyq jospar aıasynda byltyr 18 mektep avtobýsyn jańadan satyp alsa, bıyl óńir mektepterine 32 jańa kólik beriledi.
Oblys ákimi bilim sapasyn kóterýdiń mańyzyn atap ótti.
«Bilim sapasyna naqty kóńil bólýdi talap etemin. Ustazdar men oqýshylarǵa barlyq jaǵdaı jasalyp, jańa mektepter salynyp, burynnan barlary kúrdeli jáne jeńil jóndeýden ótkizilip, qajetti zamanaýı tehnologııalarmen qamtylyp jatyr. Alaıda oblysymyzda bilim salasynyń deńgeıi kóńil kónshitpeıdi. Nelikten ulttyq biryńǵaı testileý kórsetkishi tómen? Kemshilikter qaı jerden ketip otyr? Jalpy bul baǵytta bilim berý uıymdary jumysty shıratýy qajet. Basshy óz qyzmetine saı bolyp, muǵalimnen jumysty durys, ádil talap ete bilse, barlyq másele sheshimin tabady. Mektepte balaǵa tıisti deńgeıde bilim berilse, ata-ana balasyn qosymsha aqyly UBT-ǵa daıyndyq kýrstaryna bermes edi. Bul da oılanarlyq jaǵdaı. Muǵalim de aldynda otyrǵan oqýshynyń bilim sapasyna jaýapty ekenin umytpaýy kerek. Sondyqtan syndy durys qabyldap, nátıje shyǵaratyn kez ábden jetti dep oılaımyn. Sebebi jańa Qazaqstandy qurý mektep qabyrǵasynan, otbasynan bastalady. Memleket basshysynyń bizdiń aldymyzǵa qoıǵan naqty mindetter bizge belgili, biz ony oryndaý úshin barlyq kúsh jigerimizdi salamyz»,- dedi oblys ákimi.
Otyrys «Úzdik bilim berý uıymy» baıqaýynyń jeńimpazdaryn marapattaýmen aıaqtaldy.
Oblys ákimi Ońdasyn Orazalın daryndy balalarǵa arnalǵan oblystyq mamandandyrylǵan «Bilim-ınnovatsııa» lıtseı-ınternaty, Aqtóbe qalasyndaǵy №9 orta mektep-gımnazııasy, Aqtóbe qalasyndaǵy Márııa Qurmanǵalıeva atyndaǵy №32 mektep-gımnazııasy, Áıteke bı aýdany, Maǵjan Jumabaev atyndaǵy orta mektebi, Shalqar aýdany, Álibı Jangeldın atyndaǵy orta mektebin marapattap, jeńimpazdarǵa sertıfıkattar tabystady.
Sonymen qatar oblys ákimi taǵaıyndaǵan syıaqymen jáne Alǵys hatpen oblysymyzdyń 25 pedagogi marapattaldy.
