Ońdasyn Orazalın: Gazben qamtý jumystary jalǵasady
Ońdasyn Orazalın aldymen Muǵaljar aýdany Qandyaǵash qalasyndaǵy 5 qabatty 90 páterli turǵyn úıdi qaıta jańartý jumysymen tanysty. Aýdanda 1341 azamat baspana kezeginde tur. Jóndeýden ótken turǵyn úı baspana kezeginde turǵan kópbalaly otbasylarǵa, múgedekter men aýǵan soǵysy ardagerlerine beriledi. Oblys ákimi jańadan salynyp jatqan saıabaqtyń qurylysyn, turǵyn úı aýlalaryn abattandyrý, kóshelerdiń jaı- kúıin, jáne káriz júıelerin salý jumystary qalaı atqarylyp jatqandyǵyn kórdi. 110 aýlanyń 25 aýlasyna JSQ jasalyp, memlekettik saraptamadan ótken. 3 aýlanyń jóndelýine oblystyq bıýdjetten qarjy bólingen. Ońdasyn Orazalın budan soń Basshıli aýylyna bardy. Munda gaz qubyry iske qosyldy.
«Memleket basshysy Qasym-Jomart Toqaev Joldaýda basymdyqty áleýmettiń áleýetin arttyrýǵa baǵyttaǵany anyq. Aýdanda 59 372 adam nemese 88,3% kógildir otynmen qamtylyp otyr. Bıyldyń ózinde Basshıli, Temir kópir aýyldaryna gaz berildi. Halyqty gazben qamtý jumystaryna aýqymdy qarjy qajet bolsa da aldaǵy ýaqytta osy baǵyttaǵy jumystardyń sany artpaq. Máselen, 3 jyldyń ózinde Juryn-Qarakól, Muǵaljar aýyldaryna jetkizýshi gaz qubyryn jáne aýylishilik gaz bólý jelilerin salý josparlanǵan»,- dedi Ońdasyn Orazalın. Aımaq basshysy budan soń Saǵashıli aýylyndaǵy «Ramco Holding» JShS az tonnaly munaı óńdeý zaýytynyń jumysymen tanysty.145 azamatty jumyspen qamtyp otyrǵan kásiporyn dızeldik otyn, mazýt, jeńil jáne ortasha aýyr munaı dıstıplıattaryn óndiredi. Qýattylyǵy jylyna - 96 myń tonna. Shyǵarylǵan ónim elimizden ózge TMD elderine eksporttalady.
Aımaq basshysy Muǵaljar aýdanyna jasaǵan jumys sapary sońynda aýdan ákimi Asqar Sherııazdanovqa qurylysy aıaqtalmaǵan nysandardyń jumysyn ýaqtyly ári sapaly aıaqtaýdy, turǵyndarǵa memlekettik baǵdarlamalardyń tıimdiligin túsindirip, kásippen aınalysýǵa shaqyrý jumystaryn kúsheıtýdi tapsyrdy.
Aıta keteıik, oblys ákiminiń jumys sapary Temir aýdanynda jalǵasty. Óńir basshysy Aqsaı aýylyndaǵy «Nurly jol» baǵdarlamasy boıynsha 2016 jyly salynǵan sý munarasynyń jumysymen tanysty. Qubyr arqyly 800-den astam turǵyn úı taza aýyz sýmen qamtyldy. Budan soń Nurpeıis Baıǵanın atyndaǵy mektep balabaqshasyn aralady. Mektepte 105 bala bilim alady. 1981 jyly salynǵan nysanǵa 2016 jyly 53 mln teńge bólinip, kúrdeli jóndeýden ótti. Aımaq basshysy bul bilim oshaǵynyń kitaphanasyna da jeke kitap qorynan oqýlyqtar tartý etti. Mektep ishinde ornalasqan 50 oryndyq balabaqshada 28 búldirshin tárbıelenýde. Oblys ákimi Shyǵyrly jáne Aqsaı aýyldarynyń turǵyndarymen kezdesip, ınternet jelisin tartý,gaz máselesine qatysty suraqtarǵa jaýap berdi. Atalǵan máseleler jaqyn arada retimen oń sheshim tabatyndyǵyn jetkizdi. «Prezıdent Qasym-Jomart Toqaevtyń tapsyrmalarynda osy sala basty nazarǵa alynyp, erekshe kóńil bólinip otyr. Sońǵy kezderi Aqtóbe oblysynda birqatar is-sharalar qolǵa alynyp, halyq ıgiligi úshin izgi sharalar atqarylý ústinde. Aqsaı aýyldyq okrýginde ınternet jyldamdyǵyn arttyrý maqsatynda 2020 jylǵa 70 mln teńge qarastyryldy. 2020 jyldyń naýryz aıynda qurylys-montaj jumystary bastalady dep josparlanýda. Shyǵyrly aýyldyq okrýgi taratylyp, Aqsaı aýyldyq okrýgine qosylyp, halyq sany ósip keledi. Qazirgi tańda «Kar-Tel» kompanııasy Shyǵyrly aýylyn 2020 jyly uıaly baılanyspen qamtý máselesin qarastyryp jatyr»,- dedi Ońdasyn Orazalın.
Óńir basshysy Temir aýdanynyń ákimi Joldas Qalmaǵambetovke Prezıdent tapsyrmalaryna saı halyqtyń turmysyn, ál-aýqatyn arttyrý boıynsha jumysty jandandyrý qajettigin tapsyrdy.
