On óńirdegi eski, apatty jaǵdaıda turǵan mektepter jańartylady

ASTANA. KAZINFORM – Elimizdiń 10 óńirindegi apatty jaǵdaıda turǵan nemese eski mektepter tolyqtaı jańartylady. Bul týraly BIZDIÑ ORTA podkasynda Oqý-aǵartý mınıstri Ǵanı Beısembaev aıtty.

– Úsh aýysymdy mektep máselesi 20 óńirdiń tek beseýinde ǵana. Bul megapolıster – Astana, Almaty, Shymkent jáne sol qalalardyń janynda ornalasqan Túrkistan, Almaty jáne Mańǵystaý oblystary. Óıtkeni, týý protsesi men kóshi-qon nátıjesinde adam sany kóbeıip otyr, - dedi Ǵanı Beısembaev.

Mınıstr «Jaıly mektepter» negizinen elimizdiń ońtústik óńirlerinde salynyp jatqanyn tilge tıek etti. Al Soltústik Qazaqstan óńirinde mektep tapshylyǵy nemese úsh aýysymdy mektep máselesi qatty ýshyǵyp turǵan joq. Degenmen, bul óńirde 4 «Jaıly mektep» qurylysy aıaqtalýǵa jaqyn. 

– Mektep salýǵa qajettilik demografııalyq ósim joǵary jáne adam kóp kóship keletin óńirlerde ǵana bolatyn másele. Biraq, bul soltústik nemese demografııasy qalypty jaǵdaıdaǵy óńirlerde eshqandaı ózgeris bolmaıdy degen sóz emes. 1 300 mektepti qaıta jańartý ulttyq jobasy aıasynda qalǵan 10 óńirdegi mektepter apatty ne eski bolǵan jaǵdaıda jańartylady. Olardy da zamanaýı talapqa sáıkestendirý baǵytynda jumystar qolǵa alynyp jatyr, - dedi Oqý-aǵartý mınıstri.

Buǵan deıin Oqý-aǵartý mınıstri elimizdegi barlyq bilim ordasy zamanaýı «Keleshek mektepterine» aınalatynyn aıtqan edi. Sondaı-aq Ǵanı Beısembaev Qazaqstandaǵy mektepter bir aýysymdy oqytý júıesine qadam basqanyn tilge tıek etti.