Ómirde eshteńe de kesh emes - arbadaǵy tennısten absolıýtti chempıon
AQTÓBE. KAZINFORM – Erdáýlet Qadymbergenov arbadaǵy tennısten Qazaqstannyń absolıýtti chempıony. Ol endi halyqaralyq jarystarǵa qatysyp, 2028 jylǵy paralımpıadaǵa joldama alýdy josparlap otyr.
Aptasyna bes kún tórt saǵattan jattyǵamyz
Aqtóbe qalasynyń Kirpishti turǵyn alabynda ornalasqan Tennıs ortalyǵy múgedektigi bar adamdardyń sportpen shuǵyldanýyna yńǵaıly mekenge aınaldy. Munda qazir arbadaǵy tennıske qatysatyn eresekter men jasóspirim jattyǵý jasaıdy. Ádette qarapaıym adamdar 2 saǵatyn sportqa arnasa, arbada otyrǵan jandar aptasyna bes kún 4 saǵat boıy qolyna raketka ustaıdy. Olar túste eki, keshke eki saǵat boıy jattyǵý jasap, sheberlikterin shyńdaıdy. Úsh jyldaǵy jetistik - Aqtóbe Qazaqstandaǵy eń myqty komandasy bar aımaq.
- Tórt jyl buryn jol-kólik apatyna túsip, eki aıaǵymnan aıyryldym. ІІ-top múgedegimin. Kúızeliske túsip, qaıǵy jep, bos jatqandy unatpaıtyn adammyn. Arada eki aı ótkende kádimgi plastıkalyq qubyrdan protez jasap alyp, kólik rýline qaıta otyrdym. Otbasym qarsy boldy, biraq men úıde jata almadym. Kez kelgen kólikti aıdaımyn. Sóıtip bir jyldan keıin taksı qyzmetine jumysqa ornalastym. Invataksı aıdaımyn. Sol kezde tennısshi Janat Úmitqulovany ortalyqqa tasyp júrdim. Ol birde maǵan osynda kelip, jattyǵý jasaýǵa, qatarǵa qosylýǵa shaqyrdy. Biraq eki aıdaı bos ýaqyt tappadym. Sebebi túste de ınvataksıge tapsyrys bolady ári jumys berýshige de aıta almadym. Bir kúni tapsyrys keıinge qalyp, ózim ortalyqqa keldim. Jattyqtyrýshymen kezdestim. Búginde tennıspen shuǵyldanyp júrgenme bir jarym jyldan asty. Buǵan deıin tennıs oınap kórmegen adammyn,- dedi Erdáýlet Qadymbergenov.
Ol oqýshy kezinde fýtbol oınady, ústel tennısine qyzyqty. Úlken tennısti múlde bilmedi. Sebebi ol kezde arnaıy kort ta, sport kesheni de bolmaǵan. Al arbadaǵy tennıske qatysqanyna bir aıdan astam ýaqyt ótkende eńbek óz nátıjesin bere bastady.
- Tennıske qatysyp, bir jarym aı ótkende Almaty Open jarysyna jiberdi. Sol kezde juptyq oıynda Aqtan Shýngarınmen birge kortqa shyǵyp, birinshi oryn alyp keldik. Byltyr birinshi ret Qazaqstan chempıonatyna qatystym. Ol kezde úshinshi oryn aldym. Bıyl sáýir aıynda Qazaqstan Kýbogine qatysyp, ekinshi oryn aldym. Qazaqstan chempıonatyna qatysyp, jeke jáne juptyq oıynda birinshi oryn alyp, absolıýtti chempıon atandym. Qazirgi jubym - Dinmuhammed Alıakparov. Ol Astana qalasynda turady. Sportshylar jupta oınaıtyn adamdy ózderi tańdaı alady. Ekeýimiz bir-birimizge yńǵaıly boldyq,- dedi ol. Sport pen jumysty qatar alyp júrýge otbasy da, áriptesteri de qoldaý kórsetti. Invataksı qyzmeti jattyǵý ýaqytyna ıkemdeldi. Tipti túski jattyǵý da ınvataksı qyzmetin qatar atqaryp, sportshy Aqtan Shýngarındi tasymaldaıdy.
- Tańerteń 07:00-de úıden shyǵaramyn, adamdardy tasımyn. Túski as ishpesten tennıs ortalyǵyna kelemin. Keıin jattyǵýdan soń jumysqa oralamyn. Keshki saǵat 18:00-den keıin qaıta jattyǵý jasaımyn. Birinshi oryn alý úshin eńbektendik. Jattyqtyrýshynyń eńbegi zor. Shamamen aptasyna bes kún tórt saǵattan jattyǵamyz. Jattyǵý dene qyzdyrýdan bastalady. Qoldy shynyqtyrý úshin rezeńke tartamyz. Arbada otyrǵan soń kóp kúsh qolǵa túsedi ǵoı. Shapshańdyq kerek. Ereksheligi dopty eki soqqydan alýǵa bolady. Ózgesi úlken tennıs erejesimen birdeı. Aldaǵy ýaqytta toqtalyp qalmaı, shetelge shyǵýǵa daıyndalamyz. 2028 jyly bolatyn paralımpıadaǵa joldama alsam deımin. Sol úshin daıyndyq júrip jatyr. Halyqaralyq jarystarǵa qatysý, reıtıng kóterý mańyzdy. Qazaqstanda birinshi bolǵanymmen, halyqaralyq reıtıng mańyzdy,- dedi Erdáýlet Qadymbergenov.
Aqtóbe oblysy boıynsha on sportshy arbadaǵy tennıspen shuǵyldanady. Bir ǵana jasóspirim bar, qalǵanynyń bári eresek adam. Sport arqyly jańa dos taýyp, jańa ortaǵa kirgen tennısshiler qatarǵa jastardyń qosylǵanyn qalaıdy. Biraq qulshynys az, áli de úıden shyqpaı, óz-ózimen jalǵyz qalatyndar kóp.
- Tennıs sportqa, ómirge degen kózqarasymdy ózgertti. Múmkindigi shekteýli jan bolsaq ta jetistikterge jetýge bolatynyn kórsetti. Qazir jasym qyryqta. Qazaqstan chempıony boldym. Ómirde eshteńe de kesh emes. Arman-maqsatyń, nıetiń bolsa, daıyndalsań, eńbek etseń jetistikke jetýge bolady eken. Tennıs ortalyǵy arbany berdi, alǵashynda raketkany da ustatty. Qazir ózimniń jeke raketkam bar. Sheberlikti shyńdaý úshin halyqaralyq jarystardy da qarap, olardyń oıyndaryn saralap otyramyn. Maýsym aıynda Astanada ótken halyqaralyq jarysqa da qatystyq. Onda oryn almasaq ta tájirıbe jınap keldik. Kórdik, óstik. Ózim de qazir jastardy shaqyryp, qoldap otyramyn. Protez jasatýǵa barǵan kezde qyzylordalyq jigit boldy janymda. Ony da qyzyqtyryp, baǵyt-baǵdar berdim. Qazir jarysqa qatysyp júr. Jarys alańyndaǵy kortta da kezdeskenbiz. Meniń oıymsha jastar arbada otyrǵanyn kórsetkisi kelmeıdi, sondyqtan kelmeıdi. Olarǵa psıhologııalyq qoldaý kerek. Al bul jer úlken jetistikke jeteleıtin orta. Sol orta únemi tolyǵyp, jańaryp otyrsa básekelestik artady, biz de sheberlikti shyńdaı túsemiz,- dedi ol.
Aqtóbe – Qazaqstannyń Japonııasy – jattyqtyrýshy
Arbadaǵy tennıstiń, balalar tennısiniń jattyqtyrýshysy Jasulan Alnııazov eki toptyń da tilin tapqan maman. Kolledjdi támamdaǵan soń Oral qalasyndaǵy joǵary oqý ornyna tústi. 2021 jyly Ulybrıtanııadan kelgen jattyqtyrýshynyń arnaıy kýrsynan ótip, biliktiligin arttyrdy. Sodan soń áleýmettik jeli arqyly jan-jaqqa habarlandyrý berip, osy sportqa qyzyǵatyn adamdardy izdedi, ıppoterapııadan ótip júrgen adamdarmen sóılesti. Al Qazaqstan tennıs federatsııasy arba men raketka satyp alyp berip, ortalyqty jabdyqtady.
- Arbadaǵy tennıstiń ashylǵanyna úsh jyldan astam ýaqyt boldy. Aldymen arbada otyrǵan adamdarǵa arnalǵan bı úıirmesine qatysyp júrgen jastar keldi. Keıin bir-birinen estidi. Qazir 10 adam qatysyp júr. Buryn 14 adam edi. Tórteýi ázirge sporttyq klýbqa ilikpeı tur. Negizi bul sport qana emes, ońaltý joly. Bizde Ǵalamat Makar eki jyl úıinde otyryp qalyp, beıimdelýi qıynǵa tústi. Osy sportty tańdaǵan soń uıqysy, tamaqtanýy júıelendi, bulshyq eti shymyr bola tústi. Al Aqtan Shýngarınniń aıaǵyn sezinýi 15% artty. Sportta qozǵalys kóp, adam qýanady, ishtegi sezimderin syrtqa shyǵara alady. Jarysqa qatysyp medal taǵý, turaqty stıpendııa alý ǵana emes, ómir sapasyn jaqsartady,- dedi Jasulan Alnııazov.
Alǵashynda sportshylar aptasyna úsh kún bir saǵattan jattyqty. Keıin aptasyna 5 kún bir saǵatty bóldi. Qazir aptasyna 5 kún eki saǵat, al quramadaǵy sportshylar aptasyna 5 kún tórt saǵat ýaqytyn kortta ótkizedi.
- Maýsym aıynda Astanada arbadaǵy tennısten álemdik jarys boldy. Oǵan Japonııa, Ońtústik Koreıa, AQSh, Reseı, Polshadan sportshylar keldi. Bizdiń sportshylar olardyń fızıkalyq, psıhologııalyq daıyndyǵyn, oıyn júıesin kórip, úlken tennıs týraly tereń bildi. Endi jumysty júıeleımiz. Ózge elde sportshylar arbada otyrsa da, derti aýyr bolsa da janyna adam ertpeı júre beredi. Sóıtip keıbir aýrýyn jeńe bilgen. Aqtóbe de osal emes. Bizdi Qazaqstannyń Japonııasy dep aıtady. Qazir álemde sporttyń osy túrinen Japonııa birinshi orynda tur,- dedi jattyqtyrýshy. Jasulan Alnııazovtyń aıtýynsha, qatań tártip, júıeli jattyǵýdyń nátıjesi osy. Jattyǵýǵa keshigýge bolmaıdy, ýaqytyly turyp, uıyqtaý kerek. Densaýlyqqa zııandy taǵamdy jeýge tyıym salynǵan.
Arbadaǵy tennıste kúsh sportshynyń qolyna túsedi. Sondyqtan arbanyń yńǵaıly bolǵany abzal. Qazir sportshylar birdeı arbaǵa otyrsa, keıin Qazaqstan chempıondaryna jeke arba jasalady. Olar álemdik jarystarda el namysyn qorǵaýy tıis.
- Sportshynyń múmkindigine qaraı jattyǵý, júkteme beriledi. Qyzdyrý jattyǵýynan keıin rezeńke tartady. Bul qol kúshin kóbeıtedi. Dopty ózderi jınaıdy. Máselen Oralda sportshy arbany júrgize almady alǵashynda. Úsh jylda bári ózgerdi, qazir erkin meńgerip alǵan. Bul da ońaltýdyń bir joly ekeniniń dáleli. Aqtóbede de elektrarbamen júretin oıynshy bar. Sol qoly osy jerde ıkemge kelip, qozǵala bastady. Alǵashqy chempıonatqa elimizdegi óńirlerden 17 adam qatyssa, sońǵysynda 60 sportshy bardy. Bul jaqsy nátıje dep oılaımyn. Tez damý keıde quldyraýǵa ákeledi. Sondyqtan aqyryn alǵa bassaq, baǵytymyzdyń durys bolǵany,- dedi Jasulan Alnııazov.
Jattyqtyrýshy arbadaǵy tennısshilerdiń bárin jarysqa qatystyrady. Bul biriniń ornyn biri basatyndaı sportshy tárbıeleýge múmkindik berdi. Aldaǵy jospar – erekshe balalardy úıretý. Balalardy 8 jastan bastap qabyldaýǵa múmkindik bar. Olar úshin arnaıy arba da satyp alynǵan.
- Ata-analar senbeıdi, tasymaldaýdy qıynsynady. Eger senim bolsa, bári ózgerer edi. Mundaǵy kortta mektep oqýshylary da jattyǵady. Alǵashqy kezde olar arbada otyrǵan eresek adamdardy kórip túsinbedi, qoryqty. Al qazir balalar olardy qaz-qalpynda qabyldap úırendi. Tipti arbada otyrǵan sportshylar ınvataksımen jetkizip tastap, aralarynda senim, dostyq qatynas ornady. Al shetelde bári basqasha. Múgedektigi bar adamdardyń bári qalypty ómir súrip júr. Olardy bólmeıdi, teń sanaıdy. 2023 jyly Italııaǵa jol tústi. Tennıs ortalyqtarynyń bári múgedektigi bar adamdarǵa yńǵaıly etip jabdyqtalǵan. Sportshylar arba dóńgelegin ózi úredi, ózi maılap, jóndep te alady. Arbaǵa ózi otyryp, túsedi. Sóıtip bizde de osy tártip endi. Jattyqtyrýshy tek jattyqtyrady. Aldaǵy ýaqytta bir ǵımarat ishi, arnaıy oryndar ǵana emes, qoǵammen teń ómir súretin kúnge jetemiz dep oılaımyn,- dedi ol.
Aıta keteıik, bıyl maýsymda Astanada arbadaǵy tennısten alǵashqy ITF Futures Series týrnıri ótti. Ortalyq Azııa boıynsha alǵash ret uıymdastyrylǵan jarysqa AQSh, Japonııa, Aýstralııa, Frantsııa, Ońtústik Koreıa, Úndistan, Polsha, Qyrǵyzstan, Reseı, Belarýs jáne óz elimizdiń ókilderi qatysyp, birneshe kún boıy baq synady.