Ómirzaq Shókeev bıylǵy egin jınaý naýqanyndaǵy negizgi máseleni atady
«Respýblıkada dándi-daqyldardy jınaý jumystary jalǵasýda. Búgingi kúni egin jınaý jumystary Jambyl jáne Túrkistan oblystarynda aıaqtaldy. Osy óńirler boıynsha ortasha túsimdilik gektaryna - 21 tsentnerdi qurady. Jınaý jumystary Aqtóbe, Almaty, Batys Qazaqstan, Pavlodar, Qyzylorda jáne Shyǵys Qazaqstan oblystarynda júrgizilýde. Kórsetilgen oblystarda dándi-daqyldar jınalatyn alqap 3 mln gektardy quraıdy. Onyń 1,1 mln gektary jınaldy. Gektaryna 18,1 tsentner ortasha túsimdilikpen 2 mln tonna astyq bastyryldy. Astyqtyń jalpy jınalymy 20 mln tonna bolady dep boljanýda. Bul bıylǵy qýańshylyq jaǵdaıda jaman kórsetkish emes dep sanaımyz», - deıdi mınıstr.
Ómirzaq Shókeevtiń aıtýynsha, negizgi astyq ósiretin óńirler egin jınaýǵa tamyz aıynyń sońynda, qyrqúıek aıynyń basynda kirisedi.
«Ákimdikterdiń derekteri boıynsha tehnıkalar 100 paıyzǵa daıyn. Egin jınaý jumystaryn der kezinde júrgizý úshin Aýyl sharýashylyǵy mınıstrligi aýyl sharýashylyǵy taýarlaryn óndirýshilerge 394 myń tonna arzandatylǵan janar-jaǵarmaı bóldi. Shilde aıyna bólingen kólemdi óńirler negizinen tolyqtaı aldy. Tamyz aıyna arnalǵan janar-jaǵarmaı kólemi 110 myń tonna úshin aqy tólendi. Alaıda resýrs ustaýshylar tarapynan atalǵan kólemdi tıep, jóneltý máselesi oryn alyp otyr. Osyǵan baılanysty, Energetıka mınıstrliginen tamyz aıynyń sońy, qyrkúıek jáne qazan aılarynyń kólemderin ýaqtyly tıep, jóneltýdi qamtamasyz etýdi suraımyz», - dedi Shókeev.
Mınıstr dızel otyny boıynsha baǵany qalyptastyrýda problemalar baryn jasyrmady.
«Arzandatylǵan janar-jaǵarmaı baǵasy naryq baǵasynan tómen bolǵanymen, operatorlardyń qyzmetine baılanysty sońǵy baǵa joǵary kúıinde qalyp otyr. Óńirlerdiń ákimdikteri ózderiniń operatorlarymen baǵany tómendetý týrasynda jumys júrgizýi qajet. Pavlodar oblysynyń ákiminiń jumysyn erekshe atap ótkim keledi. Onda egin jınaý jumysyna arnalǵan arzandatylǵan janar-jaǵarmaı, maıdy elektrondy bólý jáne ótkizý boıynsha mınıstrliktiń jobasy pılottyq tártipte júzege asyryldy. Kólemderi aıqyn, kezek tártibimen tanaptardyń elekrondyq kartasyna jáne egistikterdiń ǵaryshtyq monıtorıngine baılanysty bólinýde. Atalǵan tájirıbeni biz 2019 jyly egin sebý basynda barlyq óńirlerge taratýdy kózdep otyrmyz», - dedi Ómirzaq Shókeev.
