«Omıkron» vırýsy bar: DSM el turǵyndaryna eskertý jasady

ASTANA. KAZINFORM - Qazaqstan Respýblıkasynda koronavırýs ınfektsııasyna baılanysty epıdemıologııalyq jaǵdaı turaqty, dep habarlaıdy QR Densaýlyq saqtaý mınıstrliginiń baspasóz qyzmeti.

Qazaqstan Respýblıkasy Densaýlyq saqtaý mınıstrligi eldegi syrqattanýshylyq pen álemdegi epıdemıologııalyq jaǵdaıǵa apta saıyn monıtorıng júrgizip otyr.

2025 jyldyń basynan beri jalpy 329 rastalǵan jaǵdaı tirkeldi, qaıtys bolý jaǵdaılary tirkelgen joq. Ótken jyldyń osy kezeńimen salystyrǵanda syrqattanýshylyq 3,7 esege azaıǵan. Respýblıka boıynsha aptasyna 25 jaǵdaıǵa deıin tirkelýde.

Infektsııalyq tósekterdiń júktemesi – 27%, reanımatsııalyq tósek-oryndar – 2%, sondaı-aq statsıonarlarda koronavırýs ınfektsııasymen 2 naýqas em qabyldaýda, jaǵdaıy – ortasha aýyrlyqta.

Álemdegi jaǵdaı sııaqty, Qazaqstanda da 2022 jyly alǵash anyqtalǵan Omıkron nusqasynyń shtamdary aınalymda júr.

Omıkron nusqasy 30-dan astam mýtatsııany qamtıdy jáne aýrýdyń jeńil ótýimen sıpattalady, sondyqtan statsıonarlyq emdeýdi qajet etpeıdi. Aýrýdyń negizgi sımptomdary – joǵarǵy tynys joldarynyń zaqymdanýy, murynnyń bitelýi, tamaqtyń aýyrýy, jótel.

Basqa elderde syrqattanýshylyqtyń ósýin eskere otyryp, Densaýlyq saqtaý mınıstrligi kelesilerdi usynady:

• jiti respıratorlyq ınfektsııamen aýyratyn adamdarmen tyǵyz qarym-qatynastan aýlaq bolý;
• qoldy, ásirese naýqas nemese olardyń aınalasyndaǵy adamdarmen tikeleı baılanystan keıin jıi jýý;
• úı-jaılardy turaqty túrde jeldetý;
• aýrý sımptomdary baıqalǵan jaǵdaıda medıtsınalyq kómekke júginý.

Osyǵan deıin Azııada COVID-19 juqtyrǵandar sany kóbeıip bara jatqany týraly habarladyq.