Omıkron shtamy Japonııa prefektýralarynyń jartysyna taraldy

TOKIO. Kyodo-QazAqparat – Elde omıkron shtamynyń birinshi jaǵdaıy tirkelgennen keıin bir aı óte, beısenbi kúni jergilikti bılik esepterine negizdelgen statıstıka jarııalandy. Oǵan sáıkes, Japonııanyń 47 prefektýrasynyń 22-sinde koronavırýstyń omıkron shtamy anyqtalǵan, dep habarlaıdy QazAqparat Kyodo agenttigine silteme jasap.

Derekterge saı, elde 500 adam omıkron shtamyn juqtyrǵan. Jańa jyldyq merekeler kezinde juqtyrý jaǵdaılary odan da artyp, medıtsına júıesine edáýir salmaq túsýi múmkin.

Omıkron juqtyrý jaǵdaılarynyń basym bóligi karantın kezinde tirkelgen. Sonymen qatar bul shtamm Tokıo men Osakýdy qosqanda, qalalyq aýdandar turǵyndarynyń arasynda da taralǵan.

Japonııa premer-mınıstri Fýmıo Kısıda qoǵamdy koronavırýstyń taralýyn aldyn alý maqsatynda qosymsha sharalardy qabyldaýǵa shaqyrdy, sebebi mereke aldynda adamdar Japonııa boıynsha saıahat jasaı bastaıdy.

Ol adamdardan merekege oraı týǵan qalalaryna oralý týraly muqııat oılanýdy surady. Sonymen qatar sapar kezinde maska taǵyp, qol jýyp, áleýmettik qashyqtyqty saqtaýǵa shaqyrdy.